DILI, STLTIMORLESTE.com – Sekretariu Jeral Partidu FRETILIN, Mari Alkatiri hatoo mensajen ba iha veteranu sira, iha buat ruma neebe naksalak tenke kuriji no hadia.
“Se iha buat ruma naksalak ita tenke kuriji ita tenke hadia, tanba veteranus sira nee Estadu rasik mak fo ba sira direitu ida, Estadu rasik tenke garante katak direitu nee labele sai fali injustisa ba balu hetan no balu la hetan, tenke tuir lei, partisipasaun ema nian,” dehan Mari ba jornalista sira iha Farol, Dili, Segunda (03/03/2025).
Nia hatutan, hanesan sobrevivente bele hakat liu ema nia mate sei moris nafatin hanesan fundador, husu veteranus hotu atu kalma oituan labele politiza demais asuntu veteranus, husik responsável sira iha kompetensia atu buka solusaun, no nia parte mos prontu hotu atu buka solusaun.
Hatan kona-ba solusaun diak, nia dehan tenke tarata tuir lei, laos nia vota ba partidu ida hasae nia ba 8a14, ida nee mak halo problema nee, tanba nee tarata asuntu ida nee tuir lei laos tuir ita nia politika.
Iha fulan Marsu nee nia sei ba too iha Konselhu Nasional Veteranus, tanba sei iha veteranus, nia hanesan fundador, nia obrigasaun buka hatene saida mak ba iha neeba, lakohi fo sala ba ema ida, kumpri dever no obrigasaun hanesan fundador, tenke buka hatene saida mak iha neeba.
Iha fatin ketak, Jurista Sergi Dias Quintas dehan, loron nee importante tebes, dignifika veteranus sira nia kontribuisaun.
“Loron veteranus nee imporatante tebes, tanba rekonhesimentu ba loron veteranus liu husi selebrasaun, nee signifika ita dignifika no valoriza veteranus sira neebe kontribui ba Timor Leste nia ukun rasik aan,” dehan nia.
(ter)
