DILI, STLTIMORLESTE.com – Relasiona ho video neebe viral, katak ema konhesidu sona joven ida ho naran Marino de Jesus iha area Gruta, Golgota Kampung Baru nian, maibe Polísia Nasionál Timor Leste (PNTL) seidauk hatene motivu husi kazu nee.
Nia dehan, maizumenus iha tuku 09:30 iha Vitima ho naran Marino de Jesus ba sosa lilin atu ba reza iha area Komoro Golgota Gruta nian, depois iha suspeitu deskonhesidu sona vitima kabun mamar parte liman karuk.
Nia tenik, iha akontesimentu nee Membru PNTL evakua kedas vitima ba Hospital Nasional Guido Valadares (HNGV) hodi halo tratamentu, no patrulhamentu Eskuadra Dom Aleixo nomos Ekipa investigasaun tun kedas ba fatin akontesimentu hodi asegura situasaun.
“Agora daudaun ita seidauk hatene motivu lo-loos kazu nee, tanba vitima sei iha hela HNGV no vitima mos kondisaun grave no seidauk bele koalia,” hatete Komandante PNTL Munisípiu Dili, Superintendente Xefe Polísia, Orlando Gomes ba jornalista sira iha Komando Munisipiu Dili, Kuarta (11/06/2025).
Nia esplika, PNTL foti mos testemunha nain rua neebe mak momentu neeba no atu ba reza iha Gruta Kampung Baru, depois sira haree vitima latan hela iha rai.
“Kona-ba prosesu kazu nee, ita halo ona prosesu investigasaun, para aprezenta ba Ministeriu Públiku, kona-ba suspeitu ita nia membru tun hela ba terenu para atu buka hatene no identifika suspeitu prinsipál neebe mak sona ita ninia vitima,” nia esplika.
Iha fatin hanesan, iha Fontes Konfirmadu iha HNGV koalia, pasiente ho naran Marino de Jesus ho idade 21 anos, hetan bankada iha nia kabun liman karuk nian, no tama mai mediku sira fo atendimentu lalais tanba raan sai barak.
“Pasiente nee agora daudaun baixa hela iha laran, maibe kondisaun grave oituan, tanba bankada nee nia hetan makaas, ita haree grave oituan, maibe agora ita nia mediku sira halo ona tratamentu ba nian, no Maromak tulun nia bele re-koopera lalais,” nia afirma.
(jen)
