DILI, STLTIMORLESTE.com – Ministeriu Eduksaun (ME) hamutuk ho parseiru halo abertura forum nasional ba profesores ho tema “Ensinu ho Kualidade ba Futuru Diak liu ba Timor Leste”.
Lia hirak nee hatoo husi Ministra Eduksaun (ME), Dulce de Jesus Soares ba jornalista sira iha City 8 Manleuana, Kinta nee (23/04/2026).
“Ohin forum nasional ba profesores sira neebe mak ME halao ba dala rua ona, iha tinan hirak liu ba halo ona forum hanesan ho apoiu UNESCO nian, tinan ida nee iha forum espesiál ita bolu profesores husi nibel ensinu edukasaun pre eskolar, ensinu baziku, ensinu sekundariu jeral, tekvo sira mai tur hamutuk atu koalia kona-ba esposu Quadro kompetensia dos profesores, ita iha ona Quadro kompetensia dos profesores. Ita mos hakat ba iha edukasaun seklu 21 neebe mak ita entrega ba teknolojia,” dehan nia.
ME Dulce dehan, uza teknolojia iha aprendizajen, entaun ho forum loron rua nee profesor sira rasik hamutuk ho peritus sira, tanba hetan peritus ida husi instituto nasional edukasaun Singapura, ema ida neebe matenek nain ida, sei mai ajuda atu fasilita iha forum ida nee, atu nunee iha Quadro kompetensia nee, ezemplu iha kompetensia nee linguistika iha komunikasaun, saida mak profesor ida tenke halo.
“Konhesimentu etika profisional no dezenvolvimentu pesoal, saida deit mak iha area ida nee nia laran, entaun husi materia ida nee sei integra ba iha servisu KFP nian, hodi bele uza hanesan mos materia ida ba avaliasaun ba kompetensia dos profesor, tinan ida nee ita bele iha ona materia ida avaliasaun foun ba profesor sira ou iha tinan 2027 sei halo avaliasaun ba Profesor ida diferente ho avaliasaun neebe mak uza iha tinan hirak liu ba, ida nee sei ajuda tebe-tebes profesor sira bele halao sira nian knaar ho diak liu,” katak nia.
Nia hatutan, avaliasaun Kiik oan ida mak hanesan nee, se karik profesor ida nia estudantes digamos iha primeiru ano, segundu no terseiru ano, ninia literasia numerasia la diak, oinsa mak profesor ida hetan muito bom tinan ba tinan, profesor nee iha area pedolojia diak ka lae, iha area linguistika, uza metodolojia diak ka lae, ida nee mak sai mata dalan ba profesor sira.
Iha fatin hanesan, Embaixadora Republika Popular Xina, Wang Wenli dehan, kleur ona sira halo kooperasaun ho TL ho UNESCO liu-liu iha area edukasaun, sira fornese bolsu estudu durante nee ba estudantes atus tolu resin, sira mos iha komitmentu atu kontinua fo apoiu maximu edukasaun iha TL, tanba ba sira edukasaun mak sai hanesan setor neebe importante tebes.
Nunee mos Xefe Edukasaun UNESCO Regional Office, Santosh Khatri dehan, UNESCO parseiru ho ME TL dezde uluk kedas, sira kontente, liu-liu profesor ninia kualidade ba iha prosesu aprendizajen, sira halo formasaun ba profesor sira kona-ba istoria, uluk sira apoiu ME kona-ba siensia matematika, sira kontenti los ho eventu ida nee no halo parseria ho ME.
Entretantu Koordenadora Ajensia ONU, Olufunmilayo Abosede Balogun-Alexander hatete, husi nasaun unidas liu husi UNESCO nomos Unicef apoiu ME, atu oinsa hasae kapasidade nomos konhesimentu profesor sira nian, atu nunee bele haklean liu tan estudantes sira nian matenek no sira nian konhesimentu kona-ba area sira neebe sira hanorin.
Hafoin ME ho parseiru abertura forum nasional, maibe fahe mos sertifikadu rekonhesimentu ba prestasaub profesores.
(jac)
