DILI, STLTIMORLESTE.com – Ministeriu Edukasaun (ME) apoiu ona kaderneta eskolar hamutuk 400 ba Ensinu Baziku Sentral (EBC – sigla português) Manleuana.
Haktuir Diretor EBC Manleuana, Carlos Correia ba jornalista STL iha nia knaar fatin Manleuana, Tersa nee (10/06/2025).
“Ami laiha difikuldade neebe mak ami hasoru, kaderneta eskolar mos ami nian sei sufisiente hela, inklui fasilidade hanesan meza no kadeira mos sufisiente hela ba ami nian estudantes sira. Kona-ba kaderneta nee ami rua adjuntu halo karta pedidu ba Ministeriu fo tan kaderneta 400 nunee mai ami nian eskola laiha problema ho kaderneta, kaderneta nee ami simu dezde seidauk halao ezame primeiru periodu ninia,” nia dehan.
Carlos dehan, kaderneta eskolar nee sira hetan apoiu husi Ministeriu Edukasaun dezde iha fulan Fevereiru tinan ida nee, nee duni kaderneta ba estudantes sira sei sufiente hela, tanba kaderneta uza atu prienxe valor estudantes sira nian ba ezame ninia.
“Nee duni ami laiha problema ba kaderneta eskolar, nunee mos ami nian meza no kadeira sufisiente hela ba ami nian estudantes sira. Meza kadeira iha sala sufisiente hela, estudantes sira tur hodi partisipa iha prosesu ensinu aprendizajen neebe fo husi profesores sira,” katak nia.
Iha fatin seluk, Koordenador Gabinete Unidade Kurikulu Nasional Ministeriu Edukasaun, João Maupelu informa, kaderneta eskolar neebe imprimi iha sentru impresaun nee distribui hotu ona ba eskola sira neebe menus kaderneta.
“Kona-ba kaderneta eskolar nee ita distribui hotu ona ba ita nian eskola sira, ita distribui bazeia ba sira nian pedidu neebe mai,” nia esplika.
(jac)
