DILI, STLTIMORLESTE.com – Ministeriu Edukasaun (ME) apoiu ona material konstrusaun ba Eskola Ensinu Baziku Filial ida iha Postu Administrativu Maubisi, Munisipiu Ainaro, no pedidu seluk sei halo verifikasaun.
Lia hirak nee hatoo husi Diretor Nasional Edukasaun Inkluzivu Asaun Sosial Eskolar (DNEIASE) iha ME, Fernando Soares ba STL iha nia knaar fatin Vila Verde, Segunda nee (17/03/2025).
“Konaba fo apoiu material konstrusaun ba ita nian eskola neebe hetan estraga husi udan no anin nee, foin ami fo apoiu ba Eskola EBF ida iha Postu Administrativu Maubesi, Munisipiu Ainaro, no eskola nee agora daudaun sira halo ona, apoiu neebe mak ami fo nee hanesan kalen 50, pregu no baut,” nia afirma.
Fernando dehan, diresaun simu pedidu lubuk ida ona mai husi munisipiu sira, liu-liu liga ba iha eskola sira neebe mak hetan estragus iha area remotas sira, tanba nee foin apoiu material ba eskola ida, restu nee sei iha prosesu verifikasaun nia laran, tanba eskola ida iha Maubisi nee udan tama iha laran aat hotu.
“Eskola ida iha Maubesi nee mak ami sei halo atendimentu uluk, ami halo atendimentu material iha semana rua liu ba ona, ida Maubisi ninia nee pedidu neebe ami simu nee mak sira husu deit kalen ho pregu,” katak nia.
Iha fatin seluk, Diretor Servisu Edukasaun Munisipiu Ainaro, Patricio da Costa Magno hatete, eskola sira iha Ainaro nee mak foin daudaun iha Postu Administrativu Maubisi iha akontesimentu eskola ida hetan estragus husi anin boot.
“Eskola EBF Demitete iha Postu Administrativu Maubisi, eskola nee anin loke kalen sira nee, ami nian pedidu ba tiha ME nasional, espera katak iha tempu badak nee ministeriu bele ajuda ona kalen ho ai para ita bele hadia fali eskola nee,” katak nia.
Nia hatutan, pedidu nee sira hatama semana rua ona, nee duni sira nian pedidu too ona iha Diretor Jeral, Diretor Nasional Infraestrutura, lojistik no DNEIASE, sira rezolve ona, no hein iha tempu badak material bele too mai ona.
“Hau hanoin estragus ladun grave, maibe kalen iha leten mak anin sobu sai hotu, ami nian sala aprendizajen tolu mak kalen anin loke hotu, nee duni seluk nee sei bele hadia diak hela, nee iha EBF Demitete Maubisi, Munisipiu Ainaro,” nia afirma.
(jac)
