DÍLI, STLTIMORLESTE.com – Ministériu Edukasaun (ME) kontinua hala’o prosesu koreksaun pontus Ezame Nasionál 2026, ne’ebé Unidade Kurríkulu Nasionál koordena.
Ministra Edukasaun, Dulce de Jesus Soares hato’o informasaun ne’e ba jornalista sira iha Eskola Ensinu Baziku (EBF) 12 de Outubru, Tasi Tolu, Tersa-feira (10/11/2026).
Dulce de Jesus husu jornalista sira atu buka informasaun diretamente iha Koordenadór Kurríkulu ME, atu hetan esplikasaun klaru kona-ba progresu koreksaun pontus.
“Hakarak hatene kona-ba koreksaun pontus ezame nasionál, bele hakbesik Koordenadór Kurríkulu iha ME atu hetan informasaun klaru,” dehan ministra.
Antes ne’e, Koordenadór Gabinete Unidade Kurríkulu Nasionál ME, João Mau Pelu, informa katak estudante na’in 51.181 partisipa iha ezame nasionál tinan 2026.
Maski nune’e, ME sei kontinua halibur dadus kona-ba estudante sira ne’ebé la tuir ezame no razaun sira ne’ebé impede sira marka prezensa.
“Estudante na’in 51.181 partisipa iha ezame nasionál, maibé relatóriu husi munisípiu seidauk tama hotu,” dehan João.
Nia esplika katak, depoisde hetan dadus kompletu, ME sei prepara no publika oráriu ba ezame nasionál faze daruak ka segunda xamada.
Segunda xamada sei fó oportunidade ba estudante sira ne’ebé la konsege tuir ezame faze dahuluk, tuir regra no manual ezame nasionál.
João mós informa katak, Unidade Kurríkulu Nasionál simu ona rezultadu resposta husi munisípiu sira, no ekipa téknika prepara hela prosesu koreksaun.
Prosesu koreksaun pontus ezame nasionál sei hala’o durante loron 30, tuir ajenda ne’ebé Ministériu Edukasaun prepara ona.
“Tuir ajenda, ita sei publika rezultadu ezame iha fulan Dezembru tinan ne’e,” nia esplika.
Nia aumenta katak, estudante balun ne’ebé la tuir ezame tanba servisu ka atividade iha rai-li’ur bele hetan oportunidade atu tuir segunda xamada, tuir regra ne’ebé aplika.
(jac)
