DILI, STLTIMORLESTE.com – Relasiona ho eskola balu neebe sei menus meza no kadeira, mak Ministeriu Edukasaun (ME) liu husi Edukasaun Munisipiu Likisa halao levantamentu ba eskola sira.
Lia hirak nee hatoo husi Diretor Edukasaun Munisipiu Likisa, Julio da Silva ba STL liu husi telefone, Domingu nee (29/12/2024).
“Hau hanoin ita liga fasilidade hanesan kadeira no meza seidauk kompletu. Ita halo levantamentu eskola seidauk relata mai, husu eskola submete fali fasilidade kadeira meza sira antes prosesu aprendizajen hahu. Eskola baziku mak barak, maibe ba ESJ, ETV no EPE sei diak hanesan tohar ka aat deit, maibe dadus seidauk mai,” nia afirma.
Julio dehan, maske edukasaun halo ona levamentu ba eskola sira neebe mak lokaliza iha Munisipiu Likisa, maibe husi parte eskola nian seidauk submete mai edukasaun munisipal liga ba fasilidade neebe sei menus iha eskola.
Iha fatin seluk, Patricio da Costa Magno hatete, kona-ba kadeira no meza koko hela, eskola neebe mak liu, bele foti taka ba iha eskola balun neebe sei menus, halo nafatin pedidu mai iha ME koko atu rezolve oituan.
“Kona-ba kadeira no meza ita koko hela, eskola neebe mak liu, ita bele foti taka ba iha eskola balu neebe sei menus, ita halo nafatin pedidu mai iha ME koko atu rezolve oituan, maibe fasilidade sira nee importante ba ita nian estudantes sira hodi bele uza ba ensinu aprendizajen iha eskola idak-idak,” tenik nia.
Nunee mos Diretor Edukasaun Munisipiu Manatuto, Patricio da Cruz Quintão hatete, meza no kadeira nee eskola balu iha ona, maibe balu mak sei menus, ba oin nee presiza atu aumenta para bele fasilita estudante sira.
(jac)
