DILI, STLTIMORLESTE.com – Ministeriu Eduksaun (ME) liu husi Servisu Edukasaun Munisípiu Bobonaro nafatin halo identifikasaun fasilidade meza no kadeira iha eskola sira iha area remotas.
“Kona-ba livrus nee distribuisaun mai tiha ona, maibe sei falta iha eskola ida iha Atabae, eskola nee mak seidauk hetan livrus nee. Ami nian eskola ida mak iha sala 6, tanba kompanhia foin halo hotu, entaun meza kadeira seidauk iha, ensinu sekundariu ida, nee mos meza kadeira laiha no ami nian eskola ida seluk mos sei menus meza kadeira. Ami kontinua identifika ita nian fasilidade iha eskola area remotas,” dehan Diretor Servisu Edukasaun Munisípiu Bobonaro, Miguel Freitas ba STL liu husi telefone, Sesta nee (01/05/2026).
Nia dehan, sira direita ba iha EBC Samutabe, EBC Bedila ho Ensinu Sekundariu Jeral Kailako, maibe sei iha eskola barak mak too agora sei menus meza no kadeira, identifika nee srvisu ekipa, hanesan husi inspetor eskolar, engeneiru no husi parte eduksaun ninia, nee duni daudaun nee lao hela iha eskola sira.
“Ita tenke ba iha eskola sira, atu nunee ita bele identifika iha eskola neebe mak too agora sei menus meza kadeira, liu-liu ita nian eskola neebe iha area remotas sira, balun sei menus meza no kadeira ba ita nian estudantes sira,” dehan nia.
Nunee mos Superintendente Edukasaun Munisipiu Dili, Cesarina Correia Guterres hatete, kona-ba kondisaun infraestrutura iha ESJ 5 Maiu konstrusaun sala 8, maibe agora daudaun paradu hela. EBC Manleuana, uma tomak 1 iha sala 4 maibe ho kondisaun aat hotu. EBF Mota Ulun presiza halo konstrusaun ba sala de aula no eskola balun presiza meza no kadeira ba estudantes sira.
“Hau hanoin kona-ba ita nian meza no kadeira maioria iha eskola sira iha Munisipiu Dili sufisiente ona, maibe iha EBF Casnafar mak meza kadeira la too no balun aat ona. Ita nian eskola balun nee fasilidade meza no kadeira sufisiente ona para estudantes sira uza ba prosesu ensinu aprendizajen iha eskola idak-idak,” nia informa.
(jac)
