DILI, STLTIMORLESTE.com – Ministeriu Edukasaun (ME) iha kooperasaun ho Governu Korea liu husi KOICA, neebe fo apoiu iha area Edukasaun.
Lia hirak nee hatoo husi Ministra Edukasaun (ME), Dulce de Jesus Soares ba jornalista sira iha sala VIP ME Vila Verde, Sesta nee (10/04/2026).
“ME iha kooperasaun ho Governu Korea liu husi KOICA iha area haat mak hanesan, ida fo apoiu ba eskola tekvo iha Bekora, iha pasadu konstrusaun sira mak ajuda ita, sira mos tau ekipamentus iha nee ba, depois iha kooperasaun boot tebe-tebes sira mak ajuda servisu ME nian mak harii sentru impresaun, neebe mak kompleta ho makina hotu,” katak nia.
ME Dulce dehan, iha Timoroan barak mak iha momentu neeba tuir formasaun lian Korea, oinsa mak atu utiliza makina sira nee, liu husi kooperasaun ida nee mak KOICA fo apoiu ba pre eskolar, asina ona akordu ida, apoiu nee liu husi UNICEF, sira sei halo konstrusaun ba eskola 14 iha Munisipiu Baukau, Bobonaro, nee meus ida diak tebes atu ajuda ME iha momentu neebe mak presiza nafatin konstrusaun ba edifisiu eskolares sira hotu.
Nunee mos Embaixador Republik Korea, Chang Ha Yeon hatete, enkontru ida ohin nee hamutuk ho Ministra Edukasaun (ME), koalia kona-ba projetu KOICA nian iha TL, iha enkontru ida nee mos oinsa mak atu haree projetu neebe implementa KOICA iha TL bele lao, liu-liu iha treinamentu nian, nee hanesan embaixador ho Koica sei haree, oinsa buka dalan ho ME, atu bele implementa projetu sira nee lao ho susesu iha Timor Leste.
“Ohin primeiru enkontru hanesan embaixador ho Ministra Edukasaun, ohin loron atu haree projetu saida mak implementa ona, no rona mos defikuldade husi ME, no ajuda iha parte saida, tanba ohin nee mai para atu rona husi ME. Maibe iha pontu ida neebe mak embaixador ho ME mensiona nee hanesan iha treinamentu, ida nee mak embaixador ho Ministra atu haree hodi bele implementa,” nia dehan.
Nia dehan, ohin nee rona difikuldade kona-ba treinamentu nian, agora atu klaru kona-ba treinamentu ba saida, nee sira sei iha diskusaun tuir mai, nomos iha parte neebe mak atu bele ajuda.
(jac)
