ME Kordena ho Ministériu Agrikultura

Ilustrasaun (Foto: Espesial)

DÍLI, STLTIMORLESTE.com – Ministériu Edukasaun (ME) kontinua halo koordenasaun ho Ministériu Agrikultura atu hasa’e produsaun agríkola lokál, hodi asegura disponibilidade ai-han ba implementasaun Programa Merenda Eskolar iha eskola sira.

Xefe Departamentu Programa Merenda Eskolar iha Ministériu Edukasaun, Belchior Maria Almeida Barros, hateten katak, implementasaun programa ne’e to’o agora lao di’ak iha munisípiu barak, maski iha munisípiu rua, Viqueque no Likisá, ne’ebé programa ne’e para temporariamente tanba orsamentu hotu ona.

Nia hato’o informasaun ne’e ba STL iha nia servisu fatin, Tersa-feira (17/11/2026).

Nia esplika katak, orsamentu ba Programa Merenda Eskolar iha munisípiu Viqueque no Likisá hotu ona iha fulan Outubru, ne’ebé halo programa ne’e labele kontinua iha eskola sira iha munisípiu rua ne’e.

“Munisípiu rua ne’ebé hau temi ona mak programa la lao, maibé munisípiu seluk kontinua implementa programa ne’e. Progresu implementasaun merenda eskolar lao di’ak. Sira simu orsamentu bazeia ba levantamentu ne’ebé iha, no menu la troka tanba Ministériu tolu aprova ona. Tanba ne’e, ami halo koordenasaun ho Ministériu Agrikultura atu hasa’e produsaun lokál hodi fornese ba programa merenda eskolar,” nia dehan.

Entretantu, Diretór Servisu Edukasaun Munisipál Dili, Sabino Perreira, hateten katak, implementasaun Programa Merenda Eskolar iha eskola sira iha Munisípiu Dili kontinua lao normal, ho eskola ida-idak implementa menu tuir orientasaun ne’ebé determina ona.

Iha parte seluk, Responsável Gabinete Apoiu Tékniku (GAT), Narciso Pinto Soares Vieira da Costa, esplika katak, fornesedór sira prepara merenda eskolar bazeia ba menu ne’ebé aprova ona. Iha Munisípiu Dili, total fornesedór na’in 12 mak envolve diretamente iha preparasaun merenda ba estudante sira.

Nia hatutan katak, GAT hala’o monitorizasaun no kontrolu durante loron Segunda-feira to’o Sexta-feira, hodi asegura katak fornesedór sira prepara no fornese merenda eskolar tuir padraun no menu ne’ebé determina ona.

“Hahu husi Segunda-feira to’o Sexta-feira, hau sempre ba haree fornesedór sira ne’ebé te’in no prepara merenda eskolar ba estudante sira. Ida-ne’e mak servisu GAT nian, ne’ebé loroloron tenke halo kontrolu ba implementasaun programa ne’e iha ami-nia eskola,” nia dehan.

(jac)

Share it :

Leave a Reply

Your email address will not be published. Required fields are marked *