ME no MS Finaliza Formasaun ba Direjente

DÍLI, STLTIMORLESTE.com – Ministériu Edukasaun (ME) hamutuk ho Ministériu Saúde (MS) finaliza ona formasaun ba koordenadór programa merenda eskolar iha nível munisipál, direjente eskola no fornecedór sira iha munisípiu 13.

Xefe Departamentu Programa Merenda Eskolar iha Ministériu Edukasaun, Belchior Maria Almeida Barros, hateten ba STL, Tersa-feira (17/11/2026), katak formasaun ne’e hahú ona iha munisípiu sira no remata iha fulan Outubru tinan ne’e.

“Formasaun ne’ebé hala’o ona iha munisípiu sira, hanesan Covalima, Ainaro no Same, agora ita finaliza ona formasaun ba direjente sira. Formasaun ne’e hala’o iha munisípiu 13 no remata iha fulan Outubru,” nia esplika.

Nia hatutan katak, formasaun ikus hala’o iha munisípiu Likisá, Bobonaro no Oe-Cusse, ho sentru formasaun iha Maliana. Formadór sira mai husi Ministériu Saúde, liuhusi Direksaun Nasionál Nutrisaun, hamutuk ho Ministériu Edukasaun.

Partisipante sira inklui koordenadór merenda eskolar iha nível munisipál, direjente eskola, koordenadór eskola no fornecedór sira.

Tuir Belchior, objetivu prinsipál husi formasaun ne’e mak atu fó orientasaun ba fornecedór sira kona-ba preparasaun hahán ne’ebé saudável no nutritivu ba estudante sira, liuliu kona-ba oinsá atu prepara modo no naan fresku ho di’ak.

“Objetivu husi formasaun ne’e mak atu fó orientasaun ba sira kona-ba preparasaun hahán ne’ebé fó kondisaun di’ak ba estudante sira. Fornecedór sira tenke hatene oinsá prepara hahán ne’ebé di’ak, liuliu modo no naan fresku ba estudante sira,” nia dehan.

Nia aumenta katak, formasaun ne’e mós importante atu asegura fornecedór sira bele prepara hahán ne’ebé tasak ho di’ak no seguru atu estudante sira bele konsume kada loron.

Iha parte seluk, Diretór Servisu Edukasaun Munisipál Ainaro, Patrício da Costa Magno, hateten katak formasaun ba direjente eskola sira importante tebes, liuliu atu komprende di’ak oinsá implementa programa merenda eskolar iha eskola.

Enkuantu Diretór EBC Manleuana, Carlos Correia, afirma katak sira partisipa ona iha formasaun kona-ba implementasaun programa merenda eskolar, atu nune’e estudante sira bele asesu merenda eskolar ho di’ak.

(jac)

Share it :

Leave a Reply

Your email address will not be published. Required fields are marked *