DILI, STLTIMORLESTE.com – Ministeriu Eduksaun (ME) prezide seminariu internasional ba dala IV hamutuk ho Membru Comunidade dos Países de Lingua Portuguesa (CPLP) kona-ba alimentasaun eskolar.
Liu husi intervista ba jornalista, Ministra Eduksaun (ME), Dulce de Jesus Soares iha edifisiu MNEK Pantai Kelapa Dili Segunda nee (04/05/2026).
“Ohin loron 4 fulan Maiu tinan 2026, iha seminariu internasional ba dala IV, kona-ba alimentasaun eskolar CPLP, Ministériu Edukasaun (ME) mak prezide hamutuk ho nasaun membru CPLP sira hotu, forum ida nee sei kontinua, hahu husi loron ohin too dia 5, 6 too dia 7, neebe mak konaba asuntu edukasaun nian CPLP, ita hein katak, ho momentu ida nee TL hamutuk ho nasaun membrus CPLP sira, ita bele aprende ba malu, pratika sira neebe mak diak iha nasaun sira seluk nian, konaba implementasaun merenda eskolar,” nia dehan.
ME Dulce hatutan, tanba programa merenda eskolar importante tebe-tebes, nasaun membrus CPLP presiza tur hamutuk atu koalia kona-ba oinsa mak estudantes sira bele asesu ai-haan neebe diak ba sira, nunee sira bele realiza potensial tomak ba sira nian futuru, TL koalia kona-ba merenda eskolar, laos programa foin, maibe programa ida neebe mak halao iha TL durante tinan barak nian laran.
“Ba TL dala ida tan katak, laos buat foun, maibe programa ida neebe mak ita halao tiha ona, ita presiza atu aprende deit husi pais sira seluk, nunee ita bele hadia diak liu tan ita nian programa merenda eskolar iha TL. Dala ida tan katak, ida nee seminariu internasional ba dala IV, neebe mak hanesan kontunuidade husi seminariu neebe mak halo tiha ona iha São Tomé Principiu, normalmente final husi seminariu nee, nasaun CPLP hasai kona-ba oinsa mak pontu de vista nasaun CPLP nian atu hadia eleva liu tan merenda eskolar,” nia esplika.
Nia dehan, iha seminariu ohin loron nee sei haree programa husi nasaun membru sira nian, depois ita tau hamutuk ita nian pensamentu, ita lansa katak CPLP nee hakarak katak, alimentasaun eskolar, ida neebe mak diak ba estudantes sira nee.
Nunee mos Diretor Servisu Edukasaun Munisípiu Dili, Sabino Pereira dehan, SEM Dili ohin mai partisipa iha seminariu internasional ida nee, nunee mos atu komemora lingua português, tanba TL mos hola parte iha membru CPLP ninia.
“Ita mos la taka aan ba ida nee, tanba nee atividades husi Ministeriu eduksaun (ME) liu husi SEM Dili ezekuta,” nia komenta.
(jac)
