DILI, STLTIMORLESTE.com – Iha tinan 2025 Ministeriu Edukasaun (ME) liu husi Unidade Kurrikulu Nasional sei produs kaderneta ba estudante iha nivel ensinu baziku.
Dehan Koordenador Gabinete Unidade Kurrikulu Nasional iha ME, Joao Mau Pelu ba STL iha nia knaar fatin, Kinta nee (19/12/2024).
“Nee 2025 mak ita foin produs fali kaderneta, tanba durante nee kaderneta neebe mak ita produs ona nee ita fahe hotu ona, nee duni tinan oin 2025 mak ita bele produs fali nee ba primeiru siklu trinta mil, segundu siklu trinta mil, terseiru siklu trinta mil. Ba ensinu tekvo ita nian kaderneta sei sufisiente hela, ba sekundariu ninia ami sei verifika, tanba tinan uluk ita produs rezerva mos sei lubuk hela,” dehan Joao.
João akresenta, ba tinan oin nee produs deit kaderneta ba estudantes ensinu baziku sira, ensinu sekundariu no tekvo tinan uluk produs sura kedas ho estudantes neebe atu tama eskola iha tinan 2025 niniam.
Iha fatin seluk, Diretor Edukasaun Munisipiu Manatuto, Patricio da Cruz Quintao dehan, kaderneta ba tinan nee distribui hotu ona ba eskola sira, kona-ba kuantidade kaderneta nee bazeia ba numeru estudante iha kada eskola idak-idak.
Nunee mos Diretor Edukasaun Munisipiu Likisa, Julio da Silva dehan, kona-ba kaderneta iha eskola sira iha Munisipiu Likisa sufisiente ona, no resin tan mak iha, tanba foin daudaun halo ona distribuisaun ba iha nivel eskolaridade.
(jac)
