DILI, STLTIMORLESTE.com – Ministeriu Edukasaun (ME) liu husi Servisu Edukasaun Munisipiu Liquiça, seidauk simu informasaun ruma husi direjente eskola sira, konaba eskola neebe estragus husi anin boot.
Lia hirak nee hatoo husi Diretor Servisu Edukasaun Munisipiu Liquiça, Julio da Silva ba STL liu husi telefone, Segunda nee (24/08/2026).
“Konaba anin boot neebe mak durante nee akontese, too ohin loron ami husi Edukasaun Liquiça seidauk simu informasaun ruma husi ita nian direjente eskola sira, bainhira eskola hetan estragus husi anin nee husi eskola sira pasa informasaun mai ami, nee duni too ohin loron seidauk iha informasaun ba asuntu nee husi ita nian direjente eskola sira, nee signifika dadus eskola hetan estragus husi anin boot nee laiha,” dehan Julio.
Nia dehan, los duni katak durante nee anin boot, maibe laiha eskola estragus, tanba sira kria grupu liu husi WhatsApp, nunee bainhira iha eskola neebe estragus, diretor eskola sira nafatin pasa informasaun ba parte Edukasaun Liquiça.
“Kuandu ita nian eskola hetan estragus ruma, sira tenke fo hatene ami para ami bele halo relatoriu nee ba Ministeriu Edukasaun, ho nunee bele hetan apoiu material emerjensia ruma, ami nian linha koordenasaun ho eskola sira lao diak hanesan baibain,” nia informa.
Nunee mos Diretor Nasional, Edukasaun Inkluzivu Asaun Sosial Eskolar, Fernando Soares esplika, pedidu nee husi eskola mak haruka ba iha Edukasaun Munisípiu, depois husi munisípiu mak submete fali mai Ministeriu Edukasaun liu husi sira nian diresaun, daudaun nee sira simu tan pedidu foun no verifika hela, pedidu foun nee kuaze lima ou neen tama tan ona, nee mai husi Munisípiu Ermera, Ainaro nee sekundariu balun, inklui Lautem no Viqueque.
“Foin daudaun ita apoiu ona material emerjensia ba ita nian eskola nivel ensinu baziku lima iha munisipiu haat, nee mak hanesan husi Munisípiu Bobonaro, Viqueque, Ainaro ho Lautem, nee ita nian nivel ensinu baziku. Nee ita fo ona apoiu iha fulan hirak liu ba, eskola hirak nee balun ninia kakuluk nee grave, nee mak ita fo apoiu material nee hanesan kalen, besi ho baut, agora daudaun ita nian material emerjensia iha armajen sei iha hela,” afirma nia.
Fernando dehan, agora daudaun sei kontinua halo verifikasaun ba eskola seluk tan, ho nunee bele halo distribuisaun material hirak nee ba eskola sira, eskola lima neebe ohin mensiona nee hetan estragus liu husi udan neebe akontese iha tinan ida nee, maibe husi diresaun ida nee halo ona atendimentu liu husi apoiu material neebe distribui ona.
“Ita nafatin halo identifikasaun, depois ita nian eskola balun ninia kondisaun kalen mos aat daudaun ona, agora tempu udan nee proposta husi ita nian eskola sira nee mai ita ba halo verifikasaun, se numeru boot ita apoiu kedas, apoiu neebe ita fo ba eskola hetan estragus nee ninia tipu mak la hanesan,” nia haktuir.
Iha fatin seluk, Diretor Servisu Edukasaun Munisipiu Ainaro, Patricio da Costa Magno hatete, kona-ba eskola hetan estragus husi anin, too ohin loron husi Edukasaun Ainaro seidauk simu informasaun ruma husi direjente eskola sira, nee duni bainhira laiha informasaun husi sira, entaun iha Ainaro dadus eskola hetan estragus laiha.
“Hau hanoin kona-ba eskola hetan estragus husi udan no anin, too ohin loron husi Edukasaun Ainaro seidauk simu informasaun ruma husi direjente eskola sira, nee duni bainhira laiha informasaun husi sira, entaun iha Ainaro dadus eskola hetan estragus laiha, tanba too agora hau seidauk simu informasaun ruma husi ita nian eskola sira,” nia afirma.
(jac)
