DILI, STLTIMORLESTE.com – Atu garante produtu lokal iha programa merenda eskolar, mak Ministériu Eduksaun (ME) servisu hamutuk ho Ministériu tolu, hanesan Ministériu Administrasaun Estatal (MAE), Ministériu Saude (MS) no Ministériu Agrikultura.
“TL nia programa merenda eskolar nee 75% nee husi produtu lokal, ida nee mak ita presiza orgulhu tebe-tebes, programa ida nee laos ME deit, maibe ami servisu hamutuk ho implementador MAE, tanba bainhira ita koalia kona-ba produtu lokal, signifika katak ME, MAE servisu hamutuk ho Ministériu Agrikultura atu garante katak, povu agrikultor sira produs duni ai-haan sira neebe mak ita presiza ba programa merenda eskolar,” dehan Ministra Eduksaun (ME), Dulce de Jesus Soares ba jornalista sira iha edifisiu MNEK Pantai Kelapa Dili, Segunda nee (04/05/2026).
Dulce dehan, koalia kona-ba batar kairala ou ai-haan sira neebe mak dala ruma fou-foun introdus, signifika tempu atu inan aman sira tein ai-haan sira nee ba labarik sira,tanba fornese ai-han iha eskola, labarik sira mos kontenti atu han.
“Tanba ai-haan sira nee foun, dala ruma sira hakfodak no sira la hatene han, seidauk hatene diferente entre batar kairala ho fos, la fasil ba labarik sira, maibe nafatin katak, TL tenke esforsu atu reforsa nafatin ita nian ai-haan, atu nunee ita labele depende deit ba fos ho batar neebe mak iha ona,” tenik nia.
Nia akresenta, ME servisu hamutuk ho Ministériu Saúde ho organizasaun WFP, atu kontinua halo reseitas sira neebe mak diak ba fornesedor ba implementasaun programa merenda eskolar ba labarik sira.
Entretantu Diretor Servisu Edukasaun Munisípiu Bobonaro, Miguel Freitas hatete, implementasaun programa merenda eskolar iha eskola Munisípiu Bobonaro lao Diak hanesan baibain.
“Ita nian programa merenda eskolar neebe mak lao iha eskola sira iha Munisípiu Bobonaro lao diak hanesan bai-bain, tanba menu neebe implementa nee tuir manual neebe mak iha ita nian eskola sira iha ona,” nia dehan.
(jac)
