DILI, STLTIMORLESTE.com – Ministeriu Edukasaun (ME) liu husi Diresaun Nasional Edukasaun Inkluzivu Asaun Sosial Eskolar (DNEIASE), kontinua simu pedidu kona-ba eskola neebe hetan estragus husi servisu edukasaun munisipal.
Dehan Fernando Soares hanesan Diretor Nasional Edukasaun Inkluzivu Asaun Sosial Eskolar iha ME ba STL iha nia knaar fatin, Kuarta nee (26/02/2025).
“Ami sei halo verifikasaun hodi bele konta kalen tahan hira, para aban ou semana oin nunee bele lori ba ona, agora pedidu foun mai hela no balu foin tama tan, depois ami sei halo rekapitulasaun, ho nunee bele pasa informasaun neebe mak klaru katak, eskola hira mak hetan estragus husi munisipiu, tanba pedidu tama nafatin iha ami nian diresaun,” nia afirma.
Nia dehan, pedidu husi munisipiu sira nee tama hotu lai mak bele fo informasaun, tanba agora prosesu nee pedidu sei mai nafatin husi munisipiu, tanba iha foho nee ba mos udan makaas, bainhira pedidu nee tama hotu no sira sei halo rekapitulasaun.
Iha fatin seluk, Diretor Servisu Edukasaun Munisipiu Ainaro, Patricio da Costa Magno hatete, eskola sira iha Ainaro nee mak foin daudaun iha Postu Administrativu Maubesi iha akontesimentu anin boot eskola ida hetan estragus husi anin boot.
“Eskola EBF demite iha Postu Administrativu Maubesi, eskola nee anin loke kalen sira nee, ami nian pedidu ba tiha ME nasional, espera katak iha tempu badak nee ministeriu bele ajuda ona kalen ho ai para ita bele hadia fali eskola nee,” katak nia.
(jac)
