DILI, STLTIMORLESTE.com – Ministeriu Edukasaun (ME) simu tan pedidu lima ou neen ba eskola neebe hetan estragus husi udan neebe akontese durante nee.
Diretor Nasional, Edukasaun Inkluzivu Asaun Sosial Eskolar, Fernando Soares esplika, pedidu nee husi eskola mak haruka ba iha Edukasaun Munisípiu, depois husi munisípiu mak submete fali mai Ministeriu Edukasaun liu husi sira nian diresaun, daudaun nee sira simu tan pedidu foun no verifika hela, pedidu foun nee kuaze lima ou neen tama tan ona, nee mai husi Munisípiu Ermera, Ainaro nee sekundariu balun, Lautem no Viqueque.
“Foin daudaun ita apoiu ona material emerjensia ba ita nian eskola nivel ensinu baziku lima iha munisipiu haat, nee mak hanesan husi Munisípiu Bobonaro, Viqueque, Ainaro ho Lautem, nee ita nian nivel ensinu baziku. Nee ita fo ona apoiu iha fulan hirak liu ba, eskola hirak nee balun ninia kakuluk nee grave, nee mak ita fo apoiu material nee hanesan kalen, besi ho baut, agora daudaun ita nian material emerjensia iha armajen sei iha hela,” afirma Fernando ba STL iha nia knaar fatin, Kuarta nee (03/06/2026).
Fernando dehan, agora daudaun sei kontinua halo verifikasaun ba eskola seluk tan, ho nunee bele halo distribuisaun material hirak nee ba eskola sira, eskola lima neebe ohin mensiona nee hetan estragus liu husi udan neebe akontese iha tinan ida nee, maibe husi diresaun ida nee halo ona atendimentu liu husi apoiu material neebe distribui ona.
“Ita nafatin halo identifikasaun, depois ita nian eskola balun ninia kondisaun kalen mos aat daudaun ona, agora tempu udan nee proposta husi ita nian eskola sira nee mai ita ba halo verifiksaun, se numeru boot ita apoiu kedas, apoiu neebe ita fo ba eskola hetan estragus nee ninia tipu mak la hanesan,” nia haktuir.
Iha fatin seluk, Diretor Servisu Edukasaun Munisipiu Liquica, Julio da Silva dehan, kona-ba eskola hetan estragus husi udan no anin, too ohin loron husi Edukasaun Liquica seidauk simu informasaun ruma mai husi direjente eskola sira, nee duni bainhira laiha informasaun husi sira, entaun iha Liquica dadus eskola hetan estragus laiha.
“Hau hanoin kona-ba eskola hetan estragus husi udan no anin, too ohin loron husi Edukasaun Liquica seidauk simu informasaun ruma husi direjente eskola sira, nee duni bainhira laiha informasaun husi sira, entaun iha Liquica dadus eskola hetan estragus laiha, tanba too agora hau seidauk simu informasaun ruma husi ita nian eskola sira,” nia afirma.
(jac)
