DILI, STLTIMORLESTE.com – Xefe Estadu Maior General FALINTIL – Forsa Defeza Timor Leste (F-FDTL), Tenente Jeneral Domingos Raul “Falur Rate Laek” hatete, Governu liu husi Ministeriu Defeza iha ona planu katak, Governu Repúblika Popular Xina Sei Konstrui Hospital Militár ba F-FDTL, tanba mediku miltar agora faze formasaun, hodi prepara hein servisu iha Hospital Militar andar ualu neebe Governu sei harii.
“Mediku Militar agora ita iha faze formasaun, ita agora espesialidade sira nain hira iha Cuba neeba, depois ita atu haruka tan nain 20 ba fali Xina, balu ba tan Indonézia, para mai prienxe estrutura ba Hospital Miltar neebe agora planu hela,” hatete Xefe Estadu Maior General F-FDTL, Tenente Jeneral Domingos Raul “Falur Rate Laek” ba jornalista sira iha Kuartel Jeneral F-FDTL Fatuhada, Dili, Kuarta (26/02/2025).
Nia dehan, laos mediku deit, maibé iha mos enfermeiru sira, nomos laboratoriu sira, rekursu hirak nee pereparadu hela, atu nunee wainhira hospital
militar nee iha ona sira hein servisu.
“Ita perepara wainhira kuandu Hospital Militar nee halo karik, ita prienxe estrutura nee deit,” nia esplika.
Nia hatutan, kona-ba Hospital Militar nee atu fo atendimentu ba miliar deit, nee depende ba desizaun polítika, maibé haree ba adaptasaun no implementasaun bele haree.
Antes nee Embaixada Xina ba Timor Leste, Wang Wenli informa, Governu Xina aprova ona akordu kooperasaun Governu Timor Leste ho Xina atu harii Hospital Militar andar ualu (8).
“Kona-ba Hospital Militar andar ualu ba militar no veteranus nee, hetan ona aprovasaun husi Governu Xina,” nia koalia.
Nunee mos Ministru Defeza, Kontra Almirante, Donaciano Costa Gomes “Pedro Klamar Fuik” esplika, sei harii hospital Militar andar ualu (8).
(jen)
