DILI, STLTIMORLESTE.com – Eskola Sekundáriu Jerál FINANTIL atualmente sei falta profesores, liuliu ba matéria Língua Portugés no Desportu.
Diretór Eskola Sekundáriu Jerál FINANTIL, Aniceto Berlelo hato’o informasaun ne’e ba STL iha nia fatin servisu, Kinta (03/09/2026).
“Ita nia profesores sira sei menus. Ba Língua Portugés mos sei menus, nune’e mos ba Desportu, ita nia profesores sira sei menus hela. Maibé, atu klaru liután, ita koalia kona-ba dadus mak loos,” nia dehan.
Enkuantu ne’e, Diretór Servisu Edukasaun Munisípiu Ainaro, Patricio da Costa Magno, hatete katak iha eskola balun professores sufisiente ona, maibé iha mos eskola balun ne’ebé sei presiza aumenta professores ba matéria balun.
“Iha eskola barak hela, ne’e bazeia ba kuadru pesoál ne’ebé ita hatama mai. Iha ita nia eskola sekundáriu balun ne’ebé sei presiza aumenta professores, inklui ba matéria Siénsia Sosiais. Iha ensinu báziku ida-rua mak professores seidauk kompletu. Nee duni, ita nia eskola 50 mak presiza aumenta professores ida-rua nune’e,” nia hatete.
Patricio da Costa Magno hatutan katak nesesidade atu aumenta professores liuliu iha área Língua Inglés no Portugés, tantu iha ensinu báziku no sekundáriu. Maibé, eskola seluk iha Munisípiu Ainaro konsidera katak númeru profesores sufisiente hela.
“Ita espera katak, ho rekrutamentu husi ME ne’e bele responde ba eskola balun iha área remota sira ne’ebé sei menus professores. La’ós eskola hotu-hotu, maibé balun deit mak atu aumenta profesores,” nia esplika.
Iha parte seluk, Diretór Eskola Sekundáriu Jerál 10 de Dezembru Comoro, Manuel Verdial, hatete katak sira presiza aumenta professores nain 8 to’o 10 atu responde ba nesesidade iha eskola.
Nia hatete katak eskola halo ona kuadru pesoál no hein professores foun sira ne’ebé sei rekrutadu liuhusi ME, atu bele koloka tuir nesesidade no kuadru pesoál iha eskola.
“Profesores hamutuk sesenta resin hitu, ami halo ona ami nia kuadru pesoál. Ami hein ita nia professores sira BK ne’e atu bele koloka mai tuir ami nia kuadru pesoál ne’ebé iha. Ami presiza atu aumenta profesores ba matéria Portugés, liuliu kuandu ita halo ona alargamentu edukasaun iha nivel territóriu,” nia deklara.
Manuel Verdial hatete, katak iha futuru sira sei presiza tan profesores ba matéria rua ka tolu, tanba professores nain rua sei tama ba idade reforma. Tanba ne’e, eskola husu atu aumenta professores entre nain 8 to’o 10.
Enkuantu, Diretór Eskola Sekundáriu Jerál nu. 4 Setembru Balide, Sergio A. da Cruz, hatete katak atualmente númeru professores iha eskola sufisiente, maibé professores nain lima sei tama ba reforma obrigatóriu iha tinan oin.
(jac)
