DILI, STLTIMORLESTE.com – Implementasaun programa merenda eskolar iha Ensinu Baziku Central (EBC) Manleuana, domina ho produtu lokal.
Lia hirak nee hatoo husi Gabinete Apoiu Tekniku (GAT) husi EBC Manleuana, Narciso Pinto Soares Vieira da Costa ba jornalista STL iha nia knaar fatin Manleuana, Sesta nee (21/08/2026).
Nia hatete, maske menu nee seidauk iha mudansa, maibe estudantes sira han mak modo tahan fresku, naan karau no aifuan fresku, nee duni domina ho produtu lokal.
“Ita nian estudantes sira nee han modo naan no ai fuan lokal deit, fos husi WFP mak hatama, menu ba programa nee laiha mudansa sei nafatin hanesan ho uluk, sosis, ayam potong nee bandu, tanba hahan sira nee kontamina ona ho formalin nee bandu ba labarik sira labele han, fornesedor sira prepara hahan ba estudantes sira kada loron, sira tein tuir menu neebe mak iha ona.
Nia dehan, iha sira nian eskola fornesedor sira tein uza ai deit, loron ida sira tein dala tolu, total fornesedor nain 12, mak daudaun nee tein ba estudantes sira han.
“Kada loron estudantes sira asesu ba programa nee ho diak, sira han tuir oras neebe iha, dala ruma ita nian estudantes sira han koto modo tahan, ayam potong ho sosis nee la fo ba estudantes sira han ida,” nia afirma.
Nunee mos Carlos Correia hanesan Diretor EBC Manleuana dehan, implementasaun programa merenda eskolar daudaun nee lao diak hela, estudantes sira depois de partisipa aula, sira sai asesu ba programa merenda eskolar.
“Ita nian implementasaun programa merenda eskolar daudaun nee lao diak hela, estudantes sira depois de partisipa aula, sira sai asesu ba programa merenda eskolar, sira han hotu, sira mos han ho aifuan, hanesan hudi, apel, aidila,” nia informa.
Carlos dehan, husi inspetor eskolar sira mai halo monitorizasaun ba programa nee iha eskola, inklui monitoring ba atividades ensinu aprendizajen iha sala, tanba nee sira la uza ayam potong no sosis ba merenda eskolar.
“Husi ita nian inspetor eskolar sira mai halo monitorizasaun ba programa nee iha eskola, inklui monitoring ba atividades ensinu aprendizajen iha aula,” nia komenta.
Entretantu Nuno Maia Nunes hanesan estudante husi EBC Manleuana dehan, loro-loron sira asesu ba merenda eskolar, han ho naan karau, koto modo tahan, hudi, aidila no apel, sente kontente mai iha eskola laos tuir deit aula, maibe asesu ba merenda eskolar neebe mak husi eskola prepara ona ba estudante sira.
(jac)
