DILI, STLTIMORLESTE.com – Universidade neebe ho dosente nivel akademiku lisensiatura so bele hanorin deit ba nivel diploma 1 too 3, maibe kuandu sira nafatin hanorin lisensatura, nee kontra lei no ministeriu sei la lisensa operasional ba sira nia kursu.
Lia hirak nee hatoo husi Diretor Jeral Ensino Superior no Siensia, Domingos Barros ba STL iha nia knaar fatin, Segunda nee (17/08/2026).
“Universidade neebe ho dosente nivel akademiku lisensiatura so bele hanorin deit ba nivel diploma 1 too 3, maibe kuandu sira nafatin hanorin lisensiatura nee kontra lei no ministeriu sei la lisensa operasional ba sira nia kursu, karik sira kontinua hanorin mos aban bainrua estudante sira nia diploma sei la hetan ligalizasaun husi ministeriu,” nia dehan.
Nia dehan, Instituisaun Ensinu Superior iha Timor Leste hamutuk 20, neebe mak fahe ba universidade privadu ho total 18 no 2 seluk mak Universidade Publiku UNTL no IPTL, ida nee mak instituisaun ensinu superior iha rai laran.
“Ita nian instituisaun ensinu superior iha Timor Leste hamutuk 20, neebe mak fahe ba universidade privadu ho total 18 no 2 seluk mak Universidade Publiku UNTL no IPTL, ida nee mak instituisaun ensinu superior iha rai laran,” dehan nia.
Iha fatin seluk, Reitor ICS, Leao Borges hatete, iha ICS dosentes ho grau lisensiatura ka S1 mos, sira nee hanorin diploma 3 ka D3. Agora daudaun iha ona aprovasaun husi Ministériu Ensinu Superiór Siénsia no Kultura (MESSK), departamentu tolu neebe mak bacharelatu sae ba lisensiatura, nee mak hanesan departamentu parteira, farmacia no nutrisaun. Nee liu husi esforsu boot ida neebe mak instituisaun halo, no hetan aprovasaun iha fulan Julhu liu ba.
“Ami nian fakuldade ida deit nee mak saude nee, ninia departamentu maka hanesan departamentu infarmajen, parteira, farmacia, nutrisaun ho laboratorium, total estudantes neebe ativu 4000 resin,” informa nia ba STL, Kuarta (13/08/2025).
Nia hatete, dosente sira agora tuir ona teste iha FDCH, sira nian 5 ka 6 liu ona iha teste nee, maibe bainhira mak ba nee seidauk iha informasaun ruma. Nee ba estudu iha area saude ninia, ba iha nasaun rua nee mak hanesan Portugal no Brazil. Universidade nee laos baratu, ida-idak ba ho ninia osan. Sira neebe ohin temi nee.
“Hau hanoin husi FDCH, maibe too agora seidauk iha serteza katak, bainhira mak sira atu ba. Ba iha area parteira, infarmajen, farmacia no laboratorium. Total dosentes permanente iha ICS hamutuk 50 resin, no balun bolu parte tempu. Parte tempu nee doutoramentu nain rua, maestradu mos iha ,maibe parte tempu hotu,” nia esplika.
Iha parte seluk, Reitor ISC, Sebastiao Perreira hatete, dosentes iha ISC doutoramentu no maestradu, nomos hirak neebe ho grau lisensiatura nee, sira kontinua estudu no Governu fo bolsu estudu ba dosente sira.
“Ami nian dosentes iha ISC doutoramentu no maestradu, nomos hirak neebe ho grau lisensiatura nee, sira kontinua estudu no Governu fo bolsu estudu ba dosente sira, tanba kapasitasaun ba ita nian dosente sira nee importante tebes,” nia informa.
(jac)
