DILI, STLTIMORLESTE.com – Ministeriu Ensinu Superior Siensia no Kultura (MESSK) kontinua verifika dokumentus pedidu lista finalista ba gradusaun husi ensinu superior balun.
Asuntu nee hatoo husi Diretor Jeral Ensino Superior no Siensia, Domingos Barros ba jornalista STL iha nia knaar fatin, Kinta nee (13/08/2026).
“ICS nia despaisu Ministerial publika ona iha jornal da republika hodi sira bele halo ona graduasaun, sira seluk ekipa verifika dokumentus kompletu no laiha ona falhansu mak haruka ba hatama iha sistema baze de dadus depois kontinua ba parte juridiku hodi analiza intermus legalidade nian foin hatoo ba Ministru hatun despaisu para bele publika iha Jornal da Republika, ida nee mak nia prosesu,” dehan nia.
Nia dehan, ICS ninia despaisu iha ona, nee duni sira bele halao ona serimonia graduasaun ba sira nian finalista sira, tanba sira nian pedidu neebe hatama mai iha ministeriu hetan ona despaisu no publika ona iha jornal da republika.
“Hau hanoin ICS ninia despaisu iha ona, nee duni sira bele halao ona serimonia graduasaun ba sira nian finalista sira, tanba sira nian pedidu neebe hatama mai iha ministeriu hetan ona despaisu no publika ona iha jornal da republika,” nia deklara.
Iha fatin la hanesan, Reitor Instituto Ciensia Saude (ICS), Leao Borges dehan, lista finalista nee ICS hatama tiha ona ba MESSK, hodi hein fo resposta, maibe tuir data neebe mak iha ona katak, hahu iha fulan Agostu tinan nee sira sei halo gradusaun ba finalista sira.
“Konaba lista finalista neebe mak ami hatama ona ba iha MESSK nee, agora daudaun ami hein hela, nee duni iha fulan Agostu nia laran mak ami sei halao graduasaun ba ami nian finalista sira neebe mak remata ona sira nian estudu, konaba resposta nee hau sei konfirma fali ho parte akademika nian, tanba husi MESSK bainhira fo resposta ona ami bele halao ona graduasaun,” nia informa.
Reitor ICS nee hatutan, graduasaun ICS nian ba finalista sira nee sei akontese iha fulan Agostu tinan ida nee nia laran, sei halo graduasaun ba finalista hamutuk 800 resin, husi numeru nee kompostu husi departamentu lima, ne mak hanesan infarmajen, parteira, farmacia, nutrisaun ho Siensia biomedika laboratoriu.
(jac)
