DILI, STLTIMORLESTE.com – Akademista sira kritika makaas hahalok militante sira ne’ebe husik arbiru sira nia partidu hodi muda ba partidu seluk tanba razaun kabun mamuk, la’os tanba interese povu nian.
Kritika ne’e hato’o husi akademista UNTL, Fernando Soares da Silva, ne’ebe dehan fenomena muda partidu ne’e hatudu frakeza prinsipiu no etika politika iha Timor-Leste.
“Ema husik partidu seluk tanba kabun mamuk. Tanba iha partidu tuan nia la hetan osan, la hetan projetu, la hetan kargu. Haree partidu seluk fo promesa diak liu, nia halai ba ne’eba. Ida ne’e la’os luta politika, ida ne’e luta atu enche kabun,” Fernando hatete ba STL, iha Dili, Tersa (08/09/2026).
Fernando hatutan, hahalok hanesan ne’e sei halo demokrasia iha Timor-Leste la metin no sei estraga futuru jerasaun foun sira nian.
“Se militante ida iha ona prinsipiu no ideolojia ne’ebe forte, nia sei la husik partidu arbiru tanba deit osan ka kargu. Militante sira ne’ebe muda partidu tanba interese pesoal deit, sira hanorin buat aat ba joven sira,” nia hatete.
Tuir nia, politika ne’e tenke servi povu laos buka moris.
“Sira hatudu katak politika ne’e la’os atu servi povu, maibe atu buka moris. Ne’e mak halo povu barak lakon konfiansa ba partidu politika sira. Partidu politika tenke halo edukasaun politika ne’ebe diak, la’os sosa militante husi partidu seluk,” Fernando hatutan.
Iha parte seluk, militante husi Partidu CNRT, Luciano Salsinha hatete nia deside husik nia partidu tanba la hetan espasu no konsiderasaun.
“Ha’u servisu tinan barak ona ba CNRT, maibe ha’u haree laiha ona futuru iha ne’eba. Tanba ne’e ha’u muda ba partidu seluk atu buka moris diak liu,” Luciano hato’o.
Luciano hatutan, nia desizaun la’os tanba osan, maibe tanba dignidade.
“Ha’u la husik partidu tanba kabun, ha’u husik tanba ha’u hakarak moris ho dignidade. Tinan barak ha’u fakar ran ba partidu, maibe ikus mai ema seluk mak goza rezultadu. Tanba ne’e ha’u tenke muda, ha’u tenke buka dalan foun,” Luciano hatutan.
Entretantu kada Sesta ho Sabdu lider politika sira tun ba baze hodi halo konsolidasaun, no iha konsolidasaun ne’e sira simu militante foun husi partidu seluk ne’ebe tama ba sira nia partidu. Hafoin ne’e, sira halo imajen no video hodi posting iha media sosial hanesan Facebook, TikTok no seluk tan hodi publiku haree no fo komentariu, maibe povu barak la fiar ona tanba haree hanesan teatru politika deit.
(car)
