DILI, STLTIMORLESTE.com – Ministeriu Defeza sosa ona karreta 10 marka BAIC husi Xina ho Orsamentu Jeral Estadu (OJE) tinan 2024 ba komandantes kompanhia no komandante pelutaun sira FALINTIL-Forsa Defeza Timor Leste (F-FDTL), atu uza hodi haree forsa sira nia progresaun iha terrenu.
“Ohin Ministeriu Defesa simu viatura ka karreta 10 ba militar neebe mak ita klasifika hanesan viatura taktika uzu administrativu, katak viatura sira nee sei uza husi komandantes kompanhia sira, komandantes pelutaun sira para bele ba iha terenu hodi haree progresaun forsa sira iha terrenu,” kata Ministru Defeza, Donaciano da Costa Gomes ‘Pedro Klamar Fuik’, Ph.D ba jornalista sira, hafoin ho Xefe Estadu Maior F-FDTL, Tanente Jeneral, Domingos Raul’ Falur Rate Laek’ halo inspesaun ba karreta 10 marka BAIC husi Xina neebe Ministeriu Defeza simu, iha Resintu Kuartel Jeral F-FDTL, Fatuhada, Dili, Kuarta (11/12/2024).
Ministru Donaciano dehan, viatura sira nee nia funsaun atu uzu militar administrativu ho hanoin atu uniformiza militar sira ho viaturas neebe mak ho karakteristika militar, nunee bele hetan sira nia aprezentasaun hanesan militar, tanba durante tinan 20 nia laran sira sei uza karreta kor oin-oin. Tanba nee, tempu ona iha IX Governu Konstitusional atu halo transformasaun ba iha militar sira nia ekipamentus materiais, liu-liu atu bele alkansa objetivu neebe mak hanaran objetivu modernizasaun das forsas.
Husu kona-ba total orsamentu neebe uza hodi sosa karreta marka BAIC husi Xina nee, Ministru Donaciano hatete katak, karreta nee sosa ho OJE tinan 2024 ho total orsamentu seisentus mill dolar amerikanu.
“Viatura sira nee diak teb-tebes no viatura sira nee mai husi Xina. Ida nee viatura taktika neebe uzu administrativu no ninia prosesu manutensaun halo hanesan baibain,” dehan Ministru Donaciano.
Nunee mos Xefe Estadu Maior F-FDTL, Tenente Jeneral Domingos Raul ‘Falur Rate Laek’ hatete, Ministeriu Defesa sosa ona ekipamentus militaris hanesan karreta 10 marka BAIC husi Xina atu uza ba komandantes kompanhia no komandante pleton sira, tanba durante nee sira sei uza kareta kor oin-oin, laos karreta ho uniformiza militar nian.
“Ministeriu Defeza sosa ona material no ekipamentus militar nian para militar sira halao sira nia knaar ho profesional,” dehan Falur Rate Laek.
Nunee mos Reprezentante Dili Auto Service (DAS) Internasional, Ade Giuliano Saleh dehan katak karreta sira nee sosa husi Xina liuhusi DAS Internasional nuudar Autoridade Dealer iha Timor Leste.
“Hau nuudar reprezentante DAS Internasional (Thailandia, Asia, Indonezia no Timor Leste) atu hatete katak kareta marka BAIC nee iha kualidade diak teb-tebes. Produtu auto mobilizmu Xina nian iha mudansa makaas lahanesan uluk. Hahu husi tinan 2000, karreta Xina nian espesifikasaun no espesializasaun oin-oin,” dehan nia.
Serimonia entrega karreta 10 marka BAIC ba Ministeriu Defesa nee remata ho asina dokumentu husi reprezentante DAS Internasional iha Timor Leste, Ade Giuliano Saleh Diretor Jeral iha Ministeriu Defeza.
(jen)
