DILI, STLTIMORLESTE.com – Ministeriu Edukasaun (ME) rekonhese katak, too agora manorin sei menus iha ensinu sekundariu jeral, liu-liu ba disiplina lingua português no desportu.
Diretor Nasional Ensinu Sekundariu iha ME, Benjamin Gomes da Cruz Fernandes ba STL iha ME, Tersa nee (14/07/2026) dehan, eskola menus profesores nee mak ME rekonhese katak sei menus profesores ba disiplina português ho desportu, nomos iha materia exata balun, tanba ME foin daudaun loke hela vaga, maibe português nee ema mak ladun mai aplay vaga ida nee, maibe too tempu ida sira sei bele kompletu ba profesores neebe mak too ohin loron sei menus profesores.
“Ho profesores menus iha ita nian eskola sira, nee mak ministériu rekruta vaga, maibe ema neebe mak aplay ba vaga português nee minimu tebes, nomos iha desportu ninia mos hanesan ema minimu tebes. Los duni katak ita sei menus profesores ba area neebe mak ohin hau mensiona nee, espera ba oin ema bele mai aplay vaga ida nee, atu nunee ita bele koloka ba ita nian eskola sira nee,” nia dehan.
Benjamin dehan, ministeriu nafatin loke vaga ba profesores iha lingua português no ba disiplina seluk tan, neebe too ohin loron eskola balun sei menus, bainhira ema ruma mai aplay vaga nee ministeriu bele koloka ema hirak nee atu fasilita estudantes sira iha prosesu ensinu aprendizajen ninia.
(jac)
