BAUCAU, STLTIMORLESTE.com – Ministra Saude (MS), Elia dos Reis Amaral husu Servisu Nasional Ambulansia Emerjensia Medika, Institutu Publiku (SNAEM,IP) hadia prestasaun servisu hodi fo atendimentu diak liu tan ba pasiente sira.
Deklarasaun nee Ministra Saude Elia dos Reis Amaral hateten liu husi nia diskursu iha serimonia ensera sorumutu Konsultativu Livru Matadalan Monotorizasaun no Avaliasaun Servisu Nasional Ambulansia Emerjensia Medika, iha Salaun Soi Mali, Vila Nova Baucau, Sesta (14/08/2026).
“Hau agradese servisu SNAEM, servisu ida neebe mak ita dehan kritiku, ba konsultasaun ida nee ita haree oin nusa ita boot sira halo konsultasaun rona malu, fo ideia ba malu, fahe esperiensia ba malu hodi halao servisu atendimentu diak liu tan,” dehan MS Elia.
Nia husu Servisu Munisipal no Nasional sira presiza atu hatene programa Governu nian, neebe daudaun esforsu atu implementa politika desentralizasaun iha nivel munisipiu neebe priense kondisoens minimas, nunee servisu Munisipal no Nasional sira presiza halo preparasaun masimu ba rekursu sira atu priense iha servisu desentralizasaun nian.
Tanba koalia kona-ba Servisu Emerjensia Medika ba pasiente sira, iha neebe tuir programa Governu nian atu haketak ona atendimentu ba labarik no adultu liu husi atendimentu ambulansia pediatria nian, neebe presiza Servisu Munisipal no Nasional intende.
“Ita boot sira akompanha katak, ita halo atendimentu pediatria prontu ona iha Hospital Nasional Guido Valadares (HNGV) nomos halo ona promosaun oituan kona-ba ida nee iha Munisipiu Baucau, tanba nee ita presiza defini atendimentu ba labarik no ema adultu nian,” nia informa.
Governante nee hateten, matadalan Servisu Nasional Ambulansia Emerjensia Medika nian, prezisa diminui ona atendimentu prestasaun servisu sira hanesan transfere pasiente husi Postu Saude ba Hospital Rejional, Nasional no Referal.
Tanba, tuir Ministra nee katak, numeru atendimentu husi Servisu Nasional Emerjensia Medika liu husi Aero, Terrestre no Tasi ho total atendimentu rihun 4.600 resin iha trimestral dahuluk no daruak, maibe balu la presiza halo transferensia, tanba kondisaun bele atende deit iha Postu Saude no Sentru Saude neebe besik.
“Ita bele redus numeru rihun 4 resin nee ba iha rihun 2 resin, laos deit pasiente ou servisu kritiku sira neebe ita boot sira simu telefone, ezemplu hanesan Asu tata, maibe laos moras Raiva, nee normal, Postu Saude no Sentru Saude bele halao atendimentu la prezisa ambulansia lao too Hospital Rejional,” nia hateten.
Elia enkoraja Servisu Nasional sira atu koordena ho Servisu Munisipal ativu liu tan atendimentu iha nivel Postu Saude, Sentru Saude no Sentru Maternidade sira. Tanba bainhira simu kontaktu kritiku sira no la halo analiza tipu moras sira, maibe kontinua halo transferensia ba pasiente, mak atendimentu iha Postu Saude no Sentru Saude sira bele menus.
Nia rekonhese, los Postu Saude no Sentru Saude atu fo atendimentu saude ba komunidade sira neebe moras, maibe atu transfere ba Hospital Rejional, Referal no Nasional presiza kondisaun neebe nesesariu.
(tom)
