DILI, STLTIMORLESTE.com — Ministru Justisa, Sergio Hornai deklara katak, Governu ezonera Alexandre Corte Real husi pozisaun hanesan Vogal Konsellu Superior Majistratura Judisial (KSMJ) tanba razaun propriu.
“Iha nia razaun propriu ita halo ezonerasaun. Hetan konfiansa kuandu iha buat balu, ita avoka fali konfiansa ne’ebé ita atribui,” dehan Ministru da Justisa ba jornalista sira iha Palásiu Governu, Kuarta (16/09/2026).
Ministru esplika katak desizaun ezonerasaun ne’e bazeia mos ba motivasaun propriu, tanba iha fundamentu atu garante katak reprezentante Governu iha KSMJ tenke defende interese lejítimu instituisaun ne’ebé nia reprezenta.
“Reprezenta la’ós ho personalidade pesoál atu reprezenta interese rasik. Tenke iha koordenasaun no kooperasaun, no tenke halo ponderasaun ba kestaun estratéjiku sira ne’ebé presiza alinamentu ho konfiansa servisu ne’ebé atribui ba personalidade ida ne’e, nu’udar reprezentante instituisaun iha fatin ne’ebé nia reprezenta,” esplika Sergio Hornai.
Ministru mos hateten katak, Alexandre Corte Real antes ne’e hetan eskluzaun iha prosesu aprezentasaun kandidatura, maibé ikus mai KSMJ foti desizaun atu readmite nia kandidatura.
Tanba ne’e, Alexandre Corte Real bele kontinua kandidata ba vaga iha Tribunal Supremu Justisa (STJ), maibé tenke ses husi funsaun iha KSMJ.
Sergio Hornai esplika katak, KSMJ mak órgaun ne’ebé iha papel importante iha validasaun desizaun sira relasiona ho prosesu seleksaun no rekrutamentu ba konselheiru juíz sira ba STJ.
“Tanba ne’e, tenke livre husi ne’ebá atu evita konflitu interese,” dehan nia.
Ministru hatutan katak, tuir regra, Alexandre Corte Real nia suplente mak bele asume funsaun, maibé nafatin iha kestaun inkompatibilidade tanba ema ne’ebé sei ezerse funsaun ida iha instituisaun labele partisipa iha prosesu ne’ebé nia bele influensia ka foti desizaun.
“Kuandu ita ezerse hela funsaun ida, labele komparese iha ne’ebá atu hola desizaun ruma, tanba ita veinkula an hela iha instituisaun ne’e,” afirma Ministru.
Sergio Hornai mos dehan katak, molok aprezenta proposta ezonerasaun ba Konsellu Ministrus, bolu uluk Alexandre Corte Real atu koalia kona-ba situasaun ne’e.
Nia salienta katak, ezonerasaun ne’e la’ós de’it tanba Alexandre Corte Real konkore ba vaga iha STJ, maibé mos iha razaun seluk, inklui falta kooperasaun ho superior.
Ministru dehan, se Alexandre Corte Real kandidata iha prazu inskrisaun no dokumentus sira ne’ebé nia aprezenta prense kritériu ne’ebé determina, nia sei bele kontinua ba prosesu seleksaun. Maibé, se la prense kritériu, nia sei la bele kontinua.
Iha fatin ketak, Akademiku Universidade Nasionál Timor Lorosa’e (UNTL), Rafael de Jesus dehan, se ema ne’ebé Governu nomeia atu hala’o knar la tuir regra ne’ebé determina, tenke ezonera no nomeia ema foun atu hala’o servisu.
“Se hala’o knar la tuir regra ne’ebé iha, tenke ezonera, nomeia fali ema foun atu hala’o servisu ne’ebé iha,” dehan Rafael de Jesus.
Nia hatutan katak KSMJ iha knar importante atu haree no avalia servisu juíz sira. Tanba ne’e, presiza nomeia ema ne’ebé hala’o funsaun tuir regra no dispozisaun ne’ebé aplika.
(ter)
