DÍLI, STLTIMORLESTE.com – Ministériu Edukasaun (ME) liuhusi Sekretariadu Ensinu Sekundáriu Jerál no Ensinu Sekundáriu Tékniku-Vokasionál, kontinua esforsu atu instala projetór no komputadór desktop iha eskola sira, hodi apoia prosesu hanorin no aprende.
Sekretáriu Ensinu Sekundáriu Jerál no Ensinu Sekundáriu Tékniku-Vokasionál, Domingos Lopes Lemos, hatete ba STL, iha salaun Ian Martin, Balide, Kuarta-feira (28/10/2026), katak instalasaun ekipamentu teknolojia iha eskola sira kontinua tuir kapasidade no rekursu ne’ebé disponivel.
“Ita esforsu hela tuir ita-nia kapasidade ne’ebé iha. Maibé, bele dehan katak besik 50% hosi eskola sekundária tékniku-vokasionál sira instala ona ekipamentu, inklui Starlink, no hahú uza ona. Hau ba vizita eskola barak, no ita instala ona projetór no desktop iha eskola sira, atu profesór sira bele uza ekipamentu ne’e iha prosesu hanorin,” nia afirma.
Nia hatutan katak, Ministériu Edukasaun kontinua buka dalan atu responde ba nesesidade fasilidade prátika ba estudante sira, liuliu iha ensinu tékniku-vokasionál.
Nia rekoñese katak, iha eskola balun, fasilidade prátika ba estudante sira sei menus, nune’e presiza kontinua halo esforsu atu hadi’a kondisaun no apoiu ba aprendizajen prátiku, hodi estudante sira bele dezenvolve koñesimentu no abilidade tuir área formasaun ida-idak.
(jac)
