BAUKAU, STLTIMORLESTE.com – Governu liu husi Ministeriu Obras Publikas (MOP) seidauk fo indemnizasaun ba komunidade afetadu ba projetu reabilitasaun estrada Kelikai-Ossu hamutuk 38, iha Postu Administrativu Kelikai no Matebian, Munisipiu Baukau.
Administrador Postu Kelikai, Paulo Jacinto Moreira esplika, iha fulan Setembru 2024, ekipa husi MOP too iha terenu Postu Kelikai orienta komunidade afetadu sira kompleta dokumentus hodi submete ba prosesu indemnizasaun, nunee iha fulan Novembru 2024 kuazu komunidade afetadu konsege kompleta dokumentus, maibe too ohin loron seidauk atribui direitu ba indemnizasaun.
“Afetadu sira nee sura mos komunidade husi Postu Matebian no Kelikai hamutuk 38 familias mak afetadu, maibe seidauk selu,” hateten Paul Jacinto Moreira ba jornalista STL iha Vila Nova, Baukau, Kuarta (23/04/2025).
Nia informa, komunidade afetadu 38 refere ekipa identifika ba faze terseiru nian neebe kompostu husi uma hela fatin no plantasaun sira, enkuantu kona-ba plantasaun parte kompanhia tesi ona, maibe Governu seidauk indemniza no uma kontinua eziste, tanba seidauk fo indemnizasaun.
Nia argumentu, relasiona MOP seidauk atribui indemnizasaun ba komunidade afetadu sira, daudaun fo impaktu ba prosesu reabilitasaun estrada, tanba iha area Postu Kelikai, parte balun kompanhia seidauk nahe’e asfaltu, tanba sei okupa husi komunidade afetadu sira.
“Uma komunidade neebe afetadu seidauk selu nee seidauk muda, afeta ba titik rua ou tolu seidauk reabilita, tanba komunidade seidauk muda,” Paul Jacinto Moreira akresenta.
Nunee Autoridade Postu nee husu Ministeriu Obras Publikas atu aselera prosesu indemnizasaun ba komunidade afetadu neebe nia plantasaun hetan ona estragus nunee mos ba afetadu foun neebe ekipa rekolha ona dadus.
(tom)
