AMBENO, STLTIMORLESTE.com – Moras Lepra sei kontinua eziste iha Oecusse, tanba nee Prezidente Autoridade Rejiaun Administrativa Espesial Oecusse-Ambeno (PA-RAEOA), Regio da Cruz Salu husu ba Ministeriu Saude, liu-liu Diretor Rejional Saude atu halo peskiza neebe klean, karik moras nee mai husi bee ka natureza ka husi neebe, tanba iha Postu Administrativu Oesilo mak sei kontinua aas.
Informasaun nee hatoo husi PA-RAEOA, Regio da Cruz Salu, iha atividades workshop loron 2 iha Oecusse neebe organiza husi Misaun Lepra iha Timor Leste, halao iha Otel Lifau, Bairru Oebau, Suku Costa, Postu Administrativu Pantemakassar RAEOA, Tersa (19/05/2026) kona ba aprendizajen Anual 2026 iha Oecusse ho tema kolaborasaun ba serbisu integradu saude.
Iha intervensaun nee, Prezidente Autoridade RAEOA, Regio da Cruz Salu husu ba Saude Rejional atu halo peskiza klean, tanba saida maka moras lepra sei kontinua ejiste iha Oecusse, liu-liu iha Postu Administrativu Oesilo, sei iha kazu 13, keta moras nee mai husi bee ka husi ambiente ka husi sosiedade.
“Hau nuudarr Prezidente Autoridade RAEOA, iha komprimisiu hodi apoiu ekipa Misaun Lepra Timor Leste iha Oecusse, nunee bele prevene moras lepra iha Oe-cusse, tanba moras lepra kontinua aumenta iha Rejiaun bee,” dehan PA-RAEOA, Regio da Cruz Salu liu husi ninia diskursu iha workshop nee.
Nia haktuir tan katak, moras lepra nee kontinua aumenta iha Oecusse, nee signifika katak, Oecusse oan seidauk kuida didiak nia saude.
“Atu halo prevensaun ba moras nee, tenke halo Screening para ita hatene kauza husi moras ida nee mai husi saida, tanba ai-han ou tanba bee ka hijieniku mak ladun diak. Ita tenke haree mak nia kauza prinsipal, tanba saida mak ema iha tendensia atu hetan lepra”, dehan Prezidente Autoridade RAEOA, Regio da Cruz Salu.
Prezidente Autoridade RAEOA husu ba Diretora Servisu Rejional Saude atu halo Kontribuisaun husi servisu misaun lepra nee, tenke hamosu iha planu asaun anual ba tinan 2027.
Tuir dadus numeru afetadu moras lepra husi fulan Julhu tinan 2024 too Maiu 2026, Oecusse rejista moras lepra hamutuk ema nain 45. Husi numeru nee inklui mos labarik kiik ida. Husi kazu moras lepra ho numeru ema nain 45 nee mai husi Sub Rejiaun Oesilo nain 13, Suku Naimeco nain 10, Baoknana nain 7, Pasabe nain 9 no Kiumaonteko nain 6.
Iha biban nee, Direto Rejional Saude Oecusse, Odete Martins dehan, workshop nee Nia objetivu atu haree ba moras Lepra, Ministeriu Saude ho parseiru Misaun Lepra Timor Leste, atu haree bá Planu iha tinan 2030, bele elemina ona moras lepra iha TL.
“Iha workshop ida nee, oinsá ita haree bá linha koordenasaun hamutuk atu bele atinji ita nia objetivu hamutuk hodi elimina moras lepra iha Tian 2030, tanba haree husi numeru kazu moras lepra, iha Oecusse-Ambeno sei kontinua eziste no barak liu-liu iha Oesilo, tanba nee mak ita halibur pesoal Saude Sira iha nee, ho parseiru Sira hotu, atu Ita Kombate moras lepra, dehan nia.
(jos)
