DILI, STLTIMORLESTE.com – Movimentu Tane Aas Lian Suku Katrai Kraik (MOTALIS) lamenta tebes-tebes ho Administrador Postu Administrativu Letefoho nia diskursu, katak sei la fo espasu ba movimentu kiik hanesan MOTALIS halo movimentus entermus de ajente kontrolu iha Suku Katrai-Kraik.
Lia hirak nee hatoo husi portavoz Silvano M. de Deus ba jornalista sira, wainhira halo konferensia imprensa iha Jardim 05 de Maiu, Segunda (26/05/2025).
MOTALIS halao nia knaar nuudar ajente kontrolu sosial kabe mos ba três pilares akademikas “Edukasaun, Peskiza Dedikasaun Komunitaria, MOTALIS mai ho nia mak lema “Tane aas Lian ba Lian Laek sira nian hodi buka lia loos no justisa”.
MOTALIS nia ezistensia laos atu impede kualker tipu dezenvolvimentu, maibe movimentu ida nee eziste ho objetivu ida atu halo kontrolu sosial ba kualker tipu dezenvolvimentu neebe integradu no bele garante nia sustentabilidade ba tempu naruk iha Suku Katrai-Kraik.
Portavoz Silvano M. Deus hateten, iha ambitu komemorasaun aniversariu restaurasaun independensia ba dala 23, iha diskursu administrador hateten kualidade hanesan Administrador Postu la fo espasu ba movimentu ki’ik hanesan MOTALIS atu halo dialogu ho movimentasaun entermus de kritika autoridade sira.
“Administrador Postu Administrativu Letefoho nia liafuan la fundamenta no la komprimenta ba Konstituisaun RDTL iha artigu 40 nu. 1 neebe hatete katak sidadaun hotu-hotu iha direitu no liberdade atu hatoo informasaun no simu informasaun neebe lo-loos, no nu. 2 hatete katak, liberdade koalia no informasaun ninian labele hein limitasaun husi sensura ruma,” dehan portavoz .
Nia fundamenta, MOTALIS propoin nafatin ba Administrador Postu Letefoho tenke klasifika didiak terminolojia ba liafuan konstrusaun no alargamentu atu sosiedade bele hatene lo-loos.
“Alargamentu ho distansia kilometru ualu (8) hahu husi Aimeta ba Manukoliria no Baulisuria ne’e laos konstrusaun, maibe nee alargamentu ka expansaun ba dalan atu luan, se konstrusaun signifika katak kompanhia CCECC foin loke ka foin konstrui fali dalan ne’e, maibe estrada rural antes nee komunidade asesu tiha ona”, katak nia.
Nia sublina, administrador la komprimenta mos ba dekretu lei numeru 5/2005 neebe mak atribui kompetensia ba pesoa koletiva neebe mak iha boa vontade atu harii movimentu no asosiasaun sira seluk hakarak harii pas no estabilidude hodi kontribui ba prosesu dezenvolvimentu nasional laos atu halo krimi.
“Dekretu lei neebe mensionadu iha leten mak fö espasu ba MOTALIS halao nia knaar nuudar ajente kontrolu sosial, MOTALIS propoin ba Administrador Postu Letefoho atu lee Konstituisaun RDTL no dekreitu lei sira neebe mak agora daudaun vijente hela iha nasaun Repúblika Demokratika Timor Leste,” nia hakotu.
(EST 1)
