DILI, STLTIMORLESTE.com – Governu liu husi Ministeriu Saude (MS) entrega abulansia ida ba klinika Palasiu Prezidensial, hodi asegura funsionariu ho komunidade sira neebe hela iha areadores Palasiu Prezidente Republika.
Bainhira remata entrega abulansia, Prezidente Republika Jose Ramos Horta ba jornalista sira iha Palasiu Prezidensial, Nicolau Lobato, Bairo Pite, Dili, Kinta nee (13/03/2025) hatete, klinika Prezidensia Republika atu fo tratamentu ba funsionariu Prezidensia Republika inkkui mos sidadaun sira neebe hela besik palasiu.
“Klinika Palasiu Prezidensial nee hanesan rai barak-barak iha mundu iha servisu mediku iha Prezidensia, iha nee fo apoiu ba funsionariu sira hotu-hotu ba familia funsionariu, ema husi liur mos presiza mai tuku odamatan halo konsulta laiha problema, ekipamentu modernu ida nee bele sai hanesan ezemplu ida, buat neebe ita bele halo iha rai ida nee,” katak PR, Horta.
Prezidente Republika hatutan, bainhira nia halo vizita ba iha Indonezia dala ruma trazitu deit hela iha Hotel abulansia ida iha liur, nomos atu ba neebe Portugal abulansia ida tuir hatudu ema sira nia organizasaun, maibe iha Timor Leste, PR rasik ladun preokupa, maibe dala ruma mos derepente presiza fali.
“Ita nia ladun, hau rasik mak la liga buat ida nee, maibe dala ruma derepente presiza, maibe liu-liu loron-loron apoiu ba ema oin-oin funsionariu familia sira, hau apoiu, klaru tekniku hotu-hotu nee mai husi Ministeriu Saude haree ekipamentu no aimoruk no premeiru nesesidade,” katak PR, Horta.
Prezidente Republika hatutan, Doutor Kubanu nain rua inklui mos doutor Timoroan balu atu fo konsulta ba sidadaun neebe halo tratamentu iha klinika Prezidensia Republika.
Nunee mos Diretor Jeral, Servisu Nasional Abulansia Emerejensia Medika, Simplicio Amaral de Deus hatutan, ohin entrega abulansia tanba pedidu husi Xefe Kaza Sivil Prezidensia Republika, Ministeriu Saude koloka abulansia ida mai klinika Prezidensial Republika.
“Koloka abulansia nee mos aleinde atu asegura ita nia sua exelensia ho funsionariu sira iha nee atu asegura mos komunidade sira neebe hela besik areadores Palasiu Prezidente nian hanesan Kampu Alor, Bairo Pite, Lanut, objetivu nee laos asegura funsionariu deit maibe asegura mos komunidade neebe hela besik,” katak nia.
Nia hatete, ambulansia neebe entrega iha ida, nee tanba bazeia ba pedidu husi Xefe Kaza Sivil, tanba nee Ministeriu entrega ida deit.
Iha serimonia entrega abulansia nee marka Prezensa mos husi Prezidente Republika, Jose Ramos Horta, Primeiru Ministru, Kay Rala Xanana Gusmão, Ministra Saude, Xefe Kaza Sivil no partsipante seluk tan.
(eme)
