BAUCAU, STLTIMORLESTE.com – Ministeriu Solidariedade Sosial no Inkluzaun (MSSI) realiza workshop ho grupu trabalhu tekniku, inter-ministerial halo revizaun ba Planu Asaun Nasional (PAN) Ema ho Defisiensia (EhD) 2021-2030 no faze daruak 2026-2030 iha Munisipiu Baucau.
Ministra Solidariedade Sosial no Inkluzaun, Verónica das Dores aprezenta, Planu Asaun Nasional ba Ema ho Defisiensia refere aprova ona liu husi rezolusaun Governu numeru 07/2022, neebe sai hanesan instrumentu estratejiku atu haree Ministeriu no Instituisaun Governamentais sira hotu hodi integra inkluzaun EhD iha politika, programa no orsamentu sira.
Durante implementasaun faze dahuluk tinan 2021 too tinan 2025, observa Ministeriu Obras Publikas, Ministeriu Transporte no Komunikasaun, Ministeriu Ensinu Superior no Kultura, MSSI, Ministeriu Juventude Desportu no Arte Kultura, Sekretariu Estadu Igualdade, Sekretariu Estadu Komunikasikan Sosial, no SEFOPE mak integra ona asaun inkluziva iha planu servisu.
“Mekanizmu servisu sira nee Ema ho Defisiensia involve direitamente iha prosesu planeamentu monitorizasaun no avaliasaun neebe refleta tebes implementasaun prinsipiu neebe ema hateten katak, ita la husik ema ida iha kotuk, hau agradese ba sira laos defisiensia deit iha fiziku, maibe sira iha intelektual boot tebes,” hateten Ministra, Verónica das Dores iha sesaun abertura ba workshop no revizaun PAN EhD 2021-2030 no faze daruak 2026-2030 iha Munisipiu Baucau, Kuarta (12/08/2026).
Nia sublina, Planu Asaun Nasional ba Ema ho Defisiensia nee, daudaun linha Ministerial 13 sai implementador husi 2021-2030, maibe husi linha Ministerial 13 refere, Ministeriu rua hanesan Ministeriu Administrasaun Estatal no Ministeiru Finansas iha hela faze observasaun.
Nia fundamenta, durante implementasaun Planu Asaun refere hahu husi inisiu too ohin loron iha progresu no dezafiu, tanba nee presiza halo ajustamentu hodi implementa asaun sira neebe seidauk implementa husi tinan 2021 too 2025.
“Asaun balu neebe seidauk implementa hotu, ita presisa halo ajustamentu, tanba mudansa iha estrutura Governu ho evidensia foun mai husi SENSUS 2022, tanba nee revizaun PAN EhD faze daruak sai pontu oportunidade atu hadia ba tinan 2026 ate 2030,” Ministra Verónica katak.
Governante nee akresenta, revizaun PAN ba EhD bazeia ba avalisaun rezultadu aprezentasaun sira, neebe prosesu hotu bazeia ba konsultasaun, partisipativa husi reprezentante Ema ho Difisiensia sira.
Iha fatin hanesan, reprezentante EhD atual Diretora Community Based Rehabilitation Network Timor Leste (CBRN-TL), Norberta Vicente Soares da Cruz konsidera, revizaun Planu Asaun Nasional mak oportunidade ba Ema ho Difisiensia atu deskuti no haree hamutuk ho linha ministerial sira kona-ba atinjimentu no progresu ba implementasaun programa husi tinan 2021 too 2025. Aleinde mos haree dezafiu sira neebe hakat liu ona iha periodu kotuk.
“Husi dezafiu nee mak ita bele trasa fali planu 2026 too 2030 nian, liu liu haree indikador neebe mak ita presiza tau iha atividade sira neebe mak bele responde ba inkluzaun ema ho defisiensia iha linha ministerial sira,” Norberta hateten.
Nia iha esperansa ba revizaun PAN EhD faze daruak 2026-2030 bele fo oportunidade ba Ema ho Defisiensia sira involve makaas liu tan iha nivel foti desizaun nian no asegura sira nia lian iha dokumentus importante sira ba interese Nasional, tanba husi periodu kotuk involmentu Ema ho Difisiensia sei menus.
Entretantu, iha serimonia revizaun PAN EhD nee hetan partisipasaun masimu husi grupu trabalhu tekniku, reprezentante linha ministerial sira.
(tom)
