BAUKAU, STLTIMORLESTE.com – Grupu agrikultor Daitula husu Ministeriu Agrikultura Pekuaria Peskas no Floresta (MAPPF) normaliza irigasaun Kasameta iha Suku Seiçal, Postu Administrativu Baukau Vila, Munisipiu Baukau, neebe daudaun la fornese bee ba natar.
Xefe grupu agrikultor Daitula, Marcos da Cruz Soares “Boulesa” aprezenta, Suku Seiçal iha pontensial ba produtu agrikola liu liu haree kulit, maibe natar barak sei abandona, nunee tinan liu ba Ministeriu Agrikultura, Pekuaria, Peskas no Floresta mobiliza ekipamentus pezadu normaliza ona irigasaun refere neebe iha epoka tinan 2025 produz ona produsaun hare kulit iha Suku Seiçal, maibe daudaun nee irigasaun refere aat, tanba afeta husi udan boot neebe akontese foin lalais nee.
“Agora daudaun natar neebe halai ona nee hektare rua, maibe hektare rua sei sorin neeba, rua iha kraik neeba maibe difikuldade mak bee maran,” Boulesa hateten ba jornalista sira iha natar laran Seiçal, Sabadu (04/04/2026).
Nia rekonhese, mezmu Governu liu husi kompanhia internasional daudaun halao hela konstrusaun irigasaun Modobuti atu fo benefisiu ba natar sira iha Suku Seiçal inklui Suku seluk neebe sei asesu bee husi irigasaun foun refere, maibe antes atu natar sira simu bee husi irigasaun foun refere, Ministeriu Agrikultura, Pekuaria, Peskas no Floresta hare problema atual neebe komunidade agrikultores sira enfrenta iha baze hanesan irigasaun Kasameta neebe daudaun labele fo asesu bee ba natar sira.
Tanba nee husu Ministeriu relevante normaliza irigasaun Kasameta no seluk tan neebe mak hetan estragus iha epoka nee hodi la prejudika ba numeru produsaun iha rai laran.
“Halo toos halo natar prezisa bee entaun entuan prezisa organiza oinsa mak ema vontade halo toos halo natar, tanba ekipamentu neebe mak sosa sai estraga tiha deit natar toos sai abandona,” katak Boulesa.
Iha fatin hanesan, membru grupu agrikultor Daitula Manuel Soares “Maulindo” informa, grupu agrikultor Daitula planeia atu taka kabubu iha natar hektare neen neebe hektare rua besik atu finaliza ona, maibe durante nee laiha bee neebe fornese husi kanal irigasaun Kasameta ba natar refere.
“Bee agora laiha, irigasaun nee so ekipamentu pezadu mak bele kee hodi bee mai, ami husu para sira ajuda ami, se la ajuda mos la problema ami mak terus deit ona hanesan nee, se sira dehan ami mos iha direitu moris iha rai ida nee entaun sira bele ajuda ami haree bee,” Maulindo sujere.
Too notisia nee publika STL seidauk hetan konfirmasaun husi Diretor Servisu Munisipal Agrikultura Munisipiu Baukau, tanba loron feriadu.
(tom)
