Ita bele imajina nakukun dader nian namihis ba daudaun, loron matan hahu nahe-an mai, sinal inicio husi loron foun ida, kriasaun foun ida iha ita nia historia. Liu tiha silensiu, LIA-FUAN moris hikas fali, Nia mak ida kria (Genesis) no Nia mak soi (palavra performativa).
Jesus nia moris hias hatudu katak SILENSIU Nai Maromak nian, silensiu ida ne’ebe PRODUTIVO ou sei fo fuan hanesan fini ne’ebé monu, mate, atu bele fo fuan, no fo fuan barak. Silensiu Maromak nian, permite atu mate transforma ba moris. Rate sai tiha ponte ba moris no ksolok nian. Fatin mamuk “vazio, ausensia” sai tiha naroman bót ida hanesan Inan Maria virgem, Maria Madalena no feto sira experiensia. Silensiu Maromak nian núdar konvite ida ba ita nia fiar no esperansa atu Fihir ba Oan Mane Mesak núdar ida ne’ebé: HADOMI IHA LIA-FUAN HO FUAN, HATUDU IHA HAHALOK LIA-FUAN HO DOMIN. Iha Kruz, nia hakoak imi no ha’u, laós tambá ita merese, maibé tambá nia hadomi deit!
Moris oferece ba ita naroman foun ida para ita bele kompriende Jesus nia mate. Tempo ne’ebé hanesan, lori komunidade kristaun transforma ba tempo esperansa ida. Ita nia fiar tenki lori ita mai to’o iha Domingo Resurreisaun. Ida ne’e, mak sentro fiar ita sarani nian. Ita fiar iha Nia ne’ebé terus, mate no moris hias atu soi ita. Nia domin, obidensia no fidelidade ba Aman nia projeto salvasaun hetan rekompensa husi nia Aman no ita nia Aman liu husi Moris Hias. Ita hotu ne’ebé sai oan sira iha Oan Mane (somos filhos no Filho) bele mós manan grasa ida ne’e. Ida ne’e mós, mak ita nia fiar no esperansa iha tempo ohin loron iha nível global no liu- liu iha nível lokal iha ne’ebé ita experiensia desordem no incerteza iha ita nia rain.
Husi meza Quinta-Feira Santa nian to’o mai rate mamuk Domingo Resurreisaun nian, ita kompriende katak ita nia fiar hatur-an iha Maromak ida ne’ebé dehan ho Lia-Fuan, hatudu ho hahalok no justifika ho vida rasik núdar prova konkreto no real ida ba misaun salvasaun nian. Projeto salvasaun ne’e, projeto trinitário ida no ita hotu mesak deít sai beneficiario husi projeto refere.
Nuné, mai ita ba uza ‘MINA MORIN/PERFUME’ Kristo Moris Hias nian hodi lao sai hamutuk ho Maira Madalena ba haklaken globalmente no lokalmente ‘Lia-Foun Diak’ moris hias nian ba maun-alin sira ho konsciensia katak Vitoria certeza ida no odamatan Moris Hias Loke ona ba ita hotu. “Iha Kruz, Jesus hakoak ita. Laos tamba ita merese, maibé tamba nia hadomi deít. Nia fiel tomak no total, obidese sem reserva no hadomi sem limite ba Aman Kriador no ba ita Kriatura. Nune, mai ita hamrik iha Nia bandeira hun, lao ho Nia ba oin ho esperansa, ho moris foun, vizaun foun no misaun haklaken Lia-Foun-Diak ba ema hotu. So nune deit mak ita la ‘tur maran ida’, Amen, amdg! (lupersj).
Hakerek husi: Pe. Jesuita
