DILI, STLTIMORLESTE.com – Atendimentu ba pasaporte inklui Bilhete Indentida no mos Rejistru Kriminal lao normal, no sira neebe la rejista online husi Diresaun Jeral Rejistu Notariadu kontinua atende.
Tuir Diretor Servisu Rejistu Notariadu, Agustinho Gonsalves Viera katak, atendimentu atu tarata dokumentus sira lao normal, tanba nia parte sempre kontrola iha Departamentu hotu, no hakbesik aan ba iha kliente sira, tanba nee publiku balu neebe la rejista online sira kontinua atende, liu-liu ba inan ferik no katuas sira.
“Barak mak foti ona pasaporte, ajendamentu online kontinua lao, maibe sira neebe la rejista online kontinua atende liu-liu ba sira neebe idade ona hanesan ferik katuas,” dehan nia ba jornalista sira iha Notariadu, Kuarta (11/06/2025).
Hatutan, sempre tun ba kontrola parte hotu, no rona publiku balu iha problema konaba pasaporte nia parte bolu hakbesik aan mai rezolve.
Sublina, halo aproximasaun ho kliente sira atu hatene sira nia hakarak nee, labele abandona hela kliente sira, maibe husu sira kona-ba sira nia presiza.
Diretor nee reforsa, kona-ba atendimentu pasaporte iha munisipiu sira lao normal, no sira foto iha neeba lori mai iha nasional mak imprime hodi kontrola.
Informa tan, kona-ba kaderneta foun husi sira nia parte mos prepara ona akizasaun, atu nunee bele sosa fali kaderneta foun.
Iha fatin ketak, Komunidade Suku Komoro, Antonio Martins dehan, tratamentu dokumentus sira ho meius neebe simples atu ema hotu bele asesu ho lalais.
“Importante servisu sira hanesan nee tenke atendimentu ho lais atu labele hamosu preokupasaun iha sosiedade nia leet,” dehan nia.
Hatutan tan, ohin loron publiku barak mak ba buka moris iha rai liur, tanba nee ho atendimentu neebe fasil atu bele asesu hodi tarata dokumentus sira.
(ter)
