DILI, STLTIMORLESTE.com – Krimi Violensia Domestika kontinua akontese ho numeru neebe aas, maibe inan sira komesa iha ona konhesimentu kona-ba lei Violensia Domestika nian.
“Numeru aas hatudu katak inan sira neebe hasoru Violensia komesa iha ona konhesimentu kona-ba lei Violensia Demostika nian, sira hatene ona aktu violensia la diak no iha lei atu regula aktu nee, ”dehan Akademiku UNTL, Rafael de Jesus ba STL, iha Kaikoli, Dili, Kinta (12/12/2024).
Nia hatutan, kuandu numeru aas hatudu katak, inan sira neebe hasoru violensia iha sira nia moris, hatoo ona keixa iha autoridade sira hodi hatudu nia numeru aas.
Numeru aas ona, maibe presiza atu halo redusaun ba iha numeru nee liu husi kondenasaun Tribunal nian, tanba se prosesu ida tama ona iha Tribunal mak aplika pena ruma, ida nee hanesan mos parte ida atu halo redusaun iha sosiedade.
“Se laen iha halo violensia hasoru feen, Tribunal aplika pena ka sansaun ruma, laen nee sei muda nia hahalok iha familia uma laran, tanba nia hatene ona katak aktu neebe halo hasoru nia feen lei bandu,” hatete Akademiku nee.
Iha fatin ketak, Jurista Jose Maria Guterres dehan, kazu Violensia Domestika neebe tama iha Tribunal kada loron Tribunal julga barak, no Tribunal aplika kastigu tetu ho sirkunstansia sira.
“Tribunal julga prosesu ida atu foti desizaun sei tetu deklarasaun hotu, maibe iha prosesu balu desizaun neebe Tribunal aplika bele halo mudansa ba iha familia atu moris hakmatek, labele moris iha violensia,” dehan nia.
(ter)
