DILI, STLTIMORLESTE.com – Foin daudaun nee Governu liu husi Ministeriu Saude (MS) ezonera Diretora Ezekutiva Hospital Nasional Guido Valadares (HNGV), Cecilia Barros Mendonça no fo knaar nee ba Nuno Vital Soares hodi lidera HNGV, hahu ohin too mandatu Governu remata.
Diretor Ezekutivu HNGV, Nuno Vital Soares hatete, foin daudaun simu pose ona hanesan Diretór Ezekutivu HNGV kontinua reforsa servisu sira neebe antes iha, nunee atendimentu bele lao ho diak liu tan.
Nia esplika, kona-ba HNGV sei la fo komentariu barak, tanba foin mak komesa servisu hahu ohin, maibé kona-ba planu sira hanesan ezekutivu atu kontinua no reforsa saida mak iha ona.
“Hau sei la fo komentariu barak ba ita boot sira, tanba hau foin hahu servisu komesa ohin, hau hanoin estrutura sira mak tenke halo, tanba ohin hau hatete tiha ona planu estratéjia sira neebe iha, hau mai reforsa no atu kontínua buat neebe mak iha ona, se karik buat neebe mak seidauk diak, depois mak halo,” hatete Nuno ba jornalista sira iha nia knaar fatin HNGV, Tersa (11/03/2025).
Antes nee Visi Ministru Fortalesimentu Institusional Saude iha MS, José dos Reis Amaral hatoo ba empozadu sira katak, tenke esforsu makaas nunee servisu ka kompetensia neebe sira simu nee tenke ho diak.
“Hau husu ba ita boot sira nafatin servisu diak iha instituisaun sira no mos servisu sentrais, tanba nee agradese ba sesante ka okupantes kargu diresaun xefia sira neebe mak ohin loron ita boot sira hetan nomeiadu no ohin ita boot sira halo ona termu de aseitasaun karik sira neebe seidauk fila fali ba instituisaun atu bele halo ofisiál termu entrega iha neeba, nunee servisu sira bele lao ho diak,” nia deklara.
Nunee mos Komisariu Asuntu Disiplinar iha Komisaun Funsaun Publika (KFP), Agapito da Conceinção hatoo obrigadu ba sesante neebe mak durante halo knaar nuudar Diretora Ezekutivu iha Hospitál Nasionál Guido Valadares, Institutu Nasionál Farmásia Produtu no Médiku nomos Servisu Saude Sentráis iha Ministeriu Saude.
“Neebe mak la diak, bele hadia no buat neebe mak diak ita kontínua atu bele atende ita nia povu sira”, nia informa.
Entretantu, empozadu hirak nee kompostu husi Diretor Nasionál Farmasia Produtu no Médiku (INFPM), Diretor Ezekutivu HNGV, Diretor Nasional Saude Promosaun no Edukasaun iha Ministeriu Saude inklui ho kargu Xefia sira.
(jen)
