DILI, STLTIMORLESTE.com – Ministru Asuntu Kombatente Libertasaun Nasionál (MAKLN), Gil da Costa Monteiro “Oan Soru” hatete, loron veteranu neebe monu iha loron 3 Marsu nee serimónia sei la halo, tanba responsavel hotu-hotu preokupa ba dadus veteranu sira nian iha munisipiu.
Nia dehan, loron veteranu monu iha loron 3 fulan Marsu tinan 2025 dada bandeira iha resintu Konselhu Kombatente Libertasaun Nasional (CCLN).
“Ita sei hasae deit bandeira hanesan primeira semana Segunda feira, tanba loron nee monu iha Segunda feira, mais serimonia ita pronusia ona katak, serimónia tinan ida nee sei la halo,” dehan MAKLN, Gil da Costa Monteiro “Oan Soru” ba jornalista sira iha nia knaar fatin KKLN, Komoro, Dili, Kinta (27/02/2025).
Nia esplika, serimonia veteranu sei la selebra laos tanba osan laiha, maibé responsavel hotu-hotu nee idak-idak preokupa ba dadaus veteranu nian neebe sira reklamasaun.
Iha fatin ketak, Veteranus Costantino Ximenes, “Nehek Metan” informa, loron veteranu nee fo hanoin ba veteranus sira nomos fo hanoin beibeik ba jerasaun foun sira atu hatene istória veteranu nian, tanba liu husi veteranu sira nia dedikasaun mak ohin loron Timor hetan independensia.
(jen)
