DILI, STLTIMORLESTE.com – Okupantes sira iha Eskola Ensinu Baziku Central (EBC) iha Munisipiu Dili kuaze hamamuk ona fatin, no iha ESG too agora seidauk hamamuk fatin.
Tuir Superintendente Edukasaun Munisípiu Dili, Cesarina C. Guterres dehan, kona-ba okupantes sira iha areador eskola sira nee balun hamamuk ona fatin, nee iha nibel ensinu baziku nee kuaze hamamuk ona, maibe okupantes iha nibel ensinu sekundariu nee mak seidauk.
“Ita nian okupantes husi eskola ensinu baziku sira neebe komunidade sira hela ba kuaze hamumuk hotu ona, maibe eskola ESG sira mak seidauk. ESG Kuaze seidauk sai, komunidade sira hela nafatin. Razaun seluk media bele konfirma ba Diretor Servisu Edukasaun Munisipiu Dili,” dehan Cesarina ba STL iha nia knaar fatin, Tersa nee (12/05/2026).
Entretantu Diretor Servisu Edukasaun Munisípiu Dili, Sabino Pereira hatete, eskola 17 nee ida neebe, tanba ladun lembra didiak, tamba eskola 6 mak hasai ona okupantes sira nee lori ba sira nia hela fatin, neen nee mak eskola 10 Dezembru, Bidau Akadiru-hun, EBC Sergio Viera de Melo, EBC Hera, EBF Bemori, EBC esperansa da patria.
“Dadus nee hahu husi inisiu nee hau sempre koalia, eskola neebe okupantes sira hela nee iha 23, inklui areador SEM Dili hamutuk 24, ita konsege lori ona okupantes sira nee fila ba sira nian hela fatin, eskola 6 sei falta, eskola 17 nee ita nafatin halo koordenasaun ho diresaun relevantes sira,” nia afirma.
Nunee mos Diretor Eskola Sekundáriu Jeral nu. 4 Setembru Balide, Sergio A. da Cruz hatete, Eskola Sekundáriu Jeral no 4 Setembru Balide husu urjente ba Ministeriu Edukasaun (ME) atu bele rezolve okupantes iha areador eskola refere.
“Difikuldade neebe mak daudaun nee ami enfrenta mak hanesan ita nian komunidade hela iha eskola laran, sira seidauk sai, sira nia oan lao ba mai iha sala aprendizajen ninia oin no ami nian profesores sufisiente hela. Husu ba parte kompetensia atu rezolve ho emerjensia ligadun ho esforsu neebe hadia, maibe komunidade sira nia oan ba esraga hotu, fiar katak sei rezolve iha futuru,” tenik nia.
Sergio hatutan, bainhira komunidade sira hela iha resintu eskola nian, dala ruma ensinu aprendizajen lao hela, maibe komunidade sira halo movimentu tama no sai iha areador eskola nian.
(jac)
