LIKISA, STLTIMORLESTE.com – Relasiona ho papel media nuudar kontrolu sosial iha mundu, liu-liu iha Timor Leste (TL), tanba nee funsionamentu media tenke kontinua nafatin, atu fo estabilidade ba estadu no povu iha rai laran.
‘’Jornalista nia knaar atu relata akontesimentu neebe akontese iha sosiedade, entaun presiza fo kontrolu sosial, nunee bele hafanu nafatin ba parte hotu-hotu atu buka dalan hodi dezenvolve ba interese ka preokupasaun sira media iha TL,” dehan eis jornalista Tempo Indonezia, Untung Widyanto ba jornalista sira iha Likisa, Tersa (10/12/2024).
Tuir Eis Jornalista Widyanto katak, papel media nee importante liu iha sosiedade, oinsa bele fo seguransa ba setor importante sira, bele asegura ba situasaun sosial sira neebe nasaun no povu enfrenta, tanba nee papel media tenke kontinua nafatin ho diak.
Tanba jornalista sira dala ruma hasoru situasaun diak no aat hotu iha publiku nia matan, atu rekolha informasaun mos dala ruma difisil liu atu hetan, entaun oinsa mak media nee bele funsiona nia servisu sira nee ho diak, atu bele hakerek informasaun, eletroniza informasaun ba publiku ho diak.
Iha fatin hanesan, jornalista husi Media Mudansa, Zemidinio Castro Martins Ximenes dehan, jornalista nee sai seguransa sosial ba nesesidade publiku nian, tanba iha jornalista mak sai ema investigador ba kazu ka problema sosial relevante sira neebe iha.
Tanba servisu jornalista nian hanesan produtu ida neebe importante tebes atu habelar preokupasaun sosiedade nian ba ema hotu atu hatene, nunee mak papel hanesan media jornalizmu nian presiza fo atensaun nafatin, no kontinua sustentabiliza media iha TL, atu bele halo sira servisu ho diak.
Aleinde nee, Xefe Gabinete SECOMS, Eliseu Isaac hatete, jornalista tenke esforsu aan hodi update nafatin informasaun tuir kodigu jornalizmu nian, tanba husi jornalista mak ema bele konhese sosiedade nia problema no preokupasaun sira.
Tanba nee husi meiu hirak neebe jornalista sira foti atu halo, presiza lori informasaun neebe klaru, detail hodi konvida publiku atu partisipa no hatene katak kondisaun ka situasaun neebe sosiedade sempre enfrenta, mai ho razaun nee razoavel, entaun jornalista nia knaar mak tenke buka hatene fukun husi preokupasaun sira neebe komunidade enfrenta iha publiku, atu publika ba kargu xefia sira hodi halo dezenvolvimentu.
(EST 1)
