DILI, STLTIMORLESTE.com – Misaun Parseria Pasifika 2026 neebe lidera husi Naval Estadus Unidus Amerika fila-fali mai Dili fulan Agostu nee, hodi marka misaun nee nia vizita ba dala-8 mai iha Timor Leste (TL).
Xefe Estadu Maior FALINTIL- Forsa Defesa Timor Leste (F-FDTL), Tenente Jeneral Domingos Raul “Falur Rate Laek” hatete, ho onra boot mak nia dirije ba iha serimónia abertura ida nee ba Parseria Pasifiku 2026 iha Timor Leste.
Nia dehan, Parseria Pasifiku konstitui misaun asisténsia umanitária no preparasaun ba dezastre multinasionál anuál neebe boot liu halak iha rejiaun Indo-Pasifiku. Tinan-tinan, misaun ida nee halibur nasaun uma-nain no parseiru sira iha esforsu koletivu atu hametin interoperabilidade rejionál no kapasidade sira resposta ba dezastre, enkuantu kontribui simultaneamente ba seguransa no estabilidade rejiaun nian no ba konsolidasaun amizade entre ita nia povu.
“Ita servisu hamutuk, fahe konhesimentu, no aplika lisaun sira neebe aprende ona, iha konviksaun katak, hamutuk, mak garantia ba resposta ida neebe efetivu ba loron aban. Iha Timor Leste, misaun nee tradus ba projetu enjeñaria no asaun sívika, asisténsia umanitaria no ezersisiu resposta ba dezastre, inisiativa preparasaun médiku, no mos atividade komunitaria no atuasaun muzikál, sai hanesan ezemplu,” hatete Xefe Estadu Maior FALINTIL- Forsa Defesa Timor Leste (F-FDTL), Tenente Jeneral Domingos Raul “Falur Rate Laek” liu husi nia diskursu iha Kampo Demokrasia Dili, Sesta (13/08/2026).
Nia deklara, Timor Leste ho vokasaun no ho istória, uma ba dame nian, uma ba unidade nian, uma ba rekonsiliasaun no uma amizade nian.
“Ho espíritu ida nee mak ita kontinua harii parseria sira neebe iha kapasidade atu identifika no hatán ba dezafiu sira neebe ita nia rejiaun hasoru, entre sira nee destaka mudansa klimátika, tufaun no fenómenu estremu sira seluk, nume’e mos dinamika estratėjika sira neebe nia hahalok importante atu akompaña ho atensaun no prudensia,” nia esplika.
Nia koalia, kooperasaun neebe selebra ohin laos sukat deit husi projetu sira neebe remata ona ka ezersisiu sira neebe halao ona, maibe liu-liu husi konfiansa neebe harii entre Forsa Armada no entre povu. Konfiansa ida nee mak permite atu haree ba futuru ho serenidade no determinasaun.
“Tanba nee, hau aproveita oportunidade ida-nee atu espresa hau nia apresiasaun klean ba Estadus Unidus Amérika no nasaun parseiru sira hotu ba kompromisu no amizade neebe hatudu durante dekada rua kooperasaun nian,” nia koalia.
Nia hein katak serimonia ida nee marka ho dignidade, inisiu ba kapitulu seluk iha parseria istórika ida nee.
Iha fatin henesan, Embaixada Estadu Unidus Amerika nia Enkarregadu Negosiu, Bruce Begnell dehan, Parseria Pasifika Amerika nia kompromisu tempu naruk ba Timor Leste no Timor oan sira
“Tinan ida nee ami senti orgulhu servisu hamutuk ho Ministeriu oi-oin iha Governu Timor Leste hodi eleva servisu mediku profesional no hamtin kapasidade jestaun dezastre,ami senti onradu halo Parseiria ho omology timoroan sira,” dehan nia.
Nia deklara, iha Governu laran, setor privadu no sosiedade sivil hodi avansa Governu nia prioridade prinsipal sira no hadia kualidade moris ba komunidade sira iha nasaun nee.
“Misaun ida nee hatudu katak, ami nia Parseria neebe lao daudaun ho Timor Leste harii atu metin ba tempu naruk,” nia informa.
Entretantu serimonia abertura iha loron 13 fulan Agustus tinan nee hatudu atuasaun kultura, jogu amizade futebol no diskursus hatoo husi Xefe Estadu Maior Jeneral F-FDTL, Tenente Jeneral Domingos Raul “Falur Rate Laek” no Kontra Almirante Naval E.U.A Toylor, nomos Komandante Grupu Lojistika Pasifiku Osidental no Forsa Terefa 73.
(jen)
