DILI, STLTIMORLESTE.com – Forum ONG Timor Leste (FONGTIL) husu ba partidu sira, bainhira atu koloka ema neebe ba tuur iha orgaun soberania Parlamentu Nasional (PN), tenke tau ema sira iha kualidade no kapasidade atu bele jere sira nia nervozu hodi hatudu iha debate ho kualidade, ida nee mak importante.
Liafuan nee haktuir husi Prezidente Fiskal FONGTIL, Inocencio Xavier bainhira partisipa dialogu nasional, iha selebrasaun loron diretus umanus iha Salaun UCT Balide, Tersa (10/12/2024).
“Joven sira tuda malu haruka joven sira paz, maibe sira tuku malu iha parlamentu, nee hatudu sira nia infantilidade iha vida politika. Ba deputadu sira komporta aan hanesan lider, ita boot sira ba reprezenta povu husi partidu atu hatudu kualidade hanesan deputadu. Hau husu ba deputadu nain 2 husi Bankada FRETILIN no CNRT labele lori ita boot sira nia nervozu pesoal ba iha uma fukun PN, maibe hatudu kualidade reprezenta bankada iha partidu no povu ida nee, koalia ba malu ho assuntu ruma neebe importante, husi imi nia matenek no jere imi nia nervozu sira ho diak,” tenik Prezidente Fiskal FONGTIL nee.
Tanba PN nuudar fatin ba debate iha kapasidade atu halo lobi ba politika, negosiasaun politika, ida nee mak importante.
(EST 3)
