DILI, STLTIMORLESTE.com – Manorin sira ensinu baziku husi eskola sira Munisipiu Bobonaro partisipa iha formasaun konaba reforma kurrikular, no manorin husi sekundariu partisipa formasaun konaba metodolojia.
Haktuir Diretor Servisu Edukasaun Munisipiu Bobonaro, Miguel Freitas ba STL liu husi telefone, Kuarta nee (19/08/2026).
“Hau hanoin ita nian prosesu aprendizajen iha eskola sira area remotas lao tuir orientasaun neebe mak iha ona, tanba ita nian manorin sira halao aprendizajen lao tuir orariu ba disiplina ida-idak nian neebe mak iha ona. Foin daudaun nee ita nian professres idak-idak partisipa iha formasaun konaba parte ensinu aprendizajen nian iha metodolojia ninia, nunee mos ba siensia sira seluk, depois ba ensinu baziku sira nian nee iha reforma kurrikular ninia,” nia dehan.
Miguel dehan, durasaun ba formasaun nee durante loron tolu nia laran, formador neebe fo formasaun ba profesores sira, antes nee sira tuir ona formasaun iha Ministeriu Edukasaun nasional. Ensinu aprendizajen iha area remotas lao diak hanesan baibain, maske iha estudantes balun neebe sira nian distansia husi hela fatin ba eskola dook, maibe sira nafatin esforsu para kada loron bele partisipa iha aula.
“Kada loron ita nian profesores sira mantein nafatin iha eskola, kapasitasaun ba ita nian manorin sira nee kontinua lao nafatin, hodi nunee bele aumenta konhesimentu neebe mak diak ba ita nian manorin sira, ita nian monitorizasaun ba eskola nee lao nafatin,” nia informa.
Iha parte seluk, Diretor Servisu Eduksaun Munisipiu Ainaro, Patricio da Costa Magno hatete, liga ba formasaun nee husi parte INFORDEPE mak fo ba profesores sira, hanesan formasaun ba lingua, metodolojia no seluk tan, tanba liu husi formasaun hirak nee fasilita profesores sira halao aprendizajen neebe mak diak liu ba estudantes sira.
“Liga ba formasaun nee, hau hanoin husi parte INFORDEPE mak fo ba profesores sira, hanesan formasaun ba lingua, metodolojia no seluk tan, tanba liu husi formasaun hirak fasilita profesores sira halao aprendizajen neebe mak diak liu ba estudantes sira,” nia afirma.
(jac)
