DILI, STLTIMORLESTE.com – Pasiente Costantino do Carmo Soares baixa iha sala bedah laki hatete, horikalan tuku 22:38 iha Hospital Nasional Guido Valadares (HNGV) ahi mate no pasiente preokupa, tanba fo impaktu ba inan isin rua sira iha sala operasaun nomos bebe sira neebe iha sala maternidade.
“Horikalan ahi mate ami triste no preokupa tebes, tanba ahi kuandu mate labarik sira iha sala maternidade no inan isin rua balu neebe iha sala operasaun nomos pasiente sira neebe baixa iha ICU bele fo impaktu ba ema sira nian vida,” hatete Pasiente Costantino do Carmo Soares ba STL iha HNGV, Domingu (02/03/2025).
Nia dehan, pasiente hotu-hotu neebe baixa iha HGNV preokupa hodi halakan telefone nia lampra no balu sunu lilin, depois ahi mate iha oras 22:38 no lakan fali iha tuku 23:42.
“Ita haree kuaze oras rua ahi mate, familia pasiente halai runga ranga iha sala laran, tanba bebe balu toba iha vidru laran, no pasiente balu iha ICU uza oksijeniu, ita husu ida nee labele akontese tan,” nia esplika.
Iha fatin hanesan, familia pasiente Julio Filipe da Costa informa, loos duni ahi mate kuaze oras rua nia laran, konsege halo pasiente hakfodak no triste, tanba bebe barak mak iha sala maternidade, toba iha vidru laran nee presiza ahi, tanba nee Ministeriu Saude tenke fo atensaun ba ida nee,” nia deklara.
Nunee mos fontes konfirmadu Mediku Espesial ida lakohi temi naran esplika, ahi mate kuaze oras rua nia laran, sira atu fo atendimentu ba pasiente la diak tanba ahi mate, no iha sala emerjensia laran pasiente ho doutor hateke malu deit, atu halo saida, tanba ahi mate husi hun neeba, laos HNGV mak hakarak halo mate, no sira uza telefone hodi tur.
“Loos duni ahi mate kuaze oras rua nia laran, maibe buat hotu sira uza jerador neebe makina sira funsiona para bebe sira kontinua diak, iha nee kuandu ahi mate jerador nain lakan, iha sala labarik no sala operasaun nomos sala ICU, nee sira uza oksijeniu no labarik sira neebe toba iha vidru laran nee diak hela, tanba ekipamentu sira nee mesak funsiona, kuaze oras rua ahi lakan fila fali no buat hotu lao diak too agora, laiha ema ida mak mate wainhira ahi la lakan,” nia afirma.
(jen)
