DILI, STLTIMORLESTE.com – Paskua mak festa ida neebe boot liu hotu-hotu iha Kreda Katolika, tanba komemora Jesus nia terus, mate no moris hias, sai sinal esperansa ba ema hotu.
Mensajen paskua nee hatoo husi Arsebispu Arkedioseze Metropolitana Dili, Dom Virgilio Cardeal do Carmo da Silva, SDB ba sarani sira iha Arkedioseze Lecidere, Kuarta (1/4/2026).
“Paskua oferese mai ita narasaun ida triumfante laos desesperasaun, sai hanesan sinal esperansa ba ema barak, fo hanoin mai ita transformasaun no hahu foun fali, pagina foun iha ema idak-idak nia moris, ita selebra paskua iha tempu udan, bee barak halo ai sira buras no matak sinal vida, moris ambiente nee mos konvida ita atu hamatak no haburas liu tan, liu-liu hahu moris foun, maske dala barak ezije sakrifisiu no esforsu pesoal, tanba paskua eskola no instituasaun sira ferias iha semana santa, liu-liu iha tridum paskua nian,” hatete Dom Virgilio.
Bibi atan uma kreda hatete, ferias laos atu rekupera deit servisu neebe ema la konsege halo iha semana tomak, maibe ferias paskua iha konvite espesial ida atu familia sira halibur hamutuk, hanesan familia Ebreu sira nian, familia eskolante sira ho Nain feto iha senakulu.
“Atu paskua tinan nee sai biban grasa nian hodi hafoun hikas ita nia domin ba Maromak no ba maun alin sira, Papa Leão XIV mos mensajen Bispu sira Timor nian iha kuarezma no paskua, husu ita hamamuk aan atu rona Maromak nia futar lia fuan hodi habadak ita nia nanal no koalia sukat, nunee ita bele sai manu ain esperansa, pas no karidade,” Dom Virgilio.
Tanba nee atu kompleta sarani nia partisipasaun iha tridum paskua, furak oin sa ema idak-idak buka kumpri nia dever no obrigasaun Katolika, konfesa, via sakra, misa sira iha tridum paskua nian.
“Jesus nia moris hias mak marka fatuk inan ita nia fiar nian neebe tau ita, nia laran ba moris ida neebe sei la iha rohan, tanba nee iha paskua nee konvite ida mai ita iha loron boot sira ita Nai Jesus nia terus mate no moris hias nian nee, diak mos oinsa familia buka tempu ruma hamutuk halo orasaun, hateke ba Jesus ihal kruz, kruz mak sasukat boot liu hotu ona Maromak nia domin mai ita, harohan Maromak oan ida neebe ita adora, hanorin ita hadomi, haraik aan, pasiensia, perdua no laran moos honestu ba malu mak dalan ba moris foun, nia deit mak bele rekupera buat nebe lakon tiha ona,” hatete Dom Virgilio.
Bibi atan uma kreda hakarak tatoli espesial ba foin sae iha tempu paskua nee buka fo netik tempu oituan ba Maromak, tempu juventude, idade ida neebe importante liu hotu-hotu iha ema ida nia moris, Maromak hakarak tebes atu tama, maibe dala ruma ita mak la fo fatin ba Nia.
Paskua mak oportunidade ba renovasaun nee, Jesus moris hias, nia hakarak foin sae moris iha dalan ida mos mai ema hafoun nia kompromisu ba pas, paskua nee keta haluha reza ba pas iha mediu oriente, hanoin kona ba labarik no foin sae sira neebe sai vitima ba funu ida nee, foin sae doben sira mai no buka atu sai badae nain ba damen nian iha rain nunee mos iha mundu.
“Hau hakarak hatoo hau boas festa Santa Paskua nian ba sarani doben hotu hahu husi rai laran nomos Timor oan neebe namkari iha mundu, tanba buka moris nunee no matenek, iha Jesus nia moris hias ita hotu mesak ida deit, Feliz Paskua,” dehan Dom Virgilio.
(joa)
