DILI, STLTIMORLESTE.com – Partidu Demokratiku (PD) anunsiu rezultadu ikus kona-ba kongresu nasional no konferensia iha Postu Administrativu sira.
Tuir Prezidente Komisaun Politika Nasional, Adriano Nascimento katak, ohin anunsiu rezultadu reuniaun neebe Konselhu Politiku Nasional Partidu Demokratiku halo, hodi desidi loron kongresu nasional Partidu Demokratiku nian, nomos loron konferensia Postu Administrativu.
Ami informa ba publiku katak, desizaun neebe ami halo hafoin Konselhu Ezekutivu Nasional Partidu Demokratiku aprezenta kalendariu hodi halo kongresu Nasional mak ohin membru Konselhu Politiku Nasional (CPN), maioria fo votus afavor kontra ida, abstensaun ida, hodi dehan Adriano ba jornalista sira iha Salaun CNE, Sabadu (09/11/2024).
Nia hatete, aprova rezolusaun neebe dehan, hahu iha loron 19 to iha loron 20 PD sei halo kongresu Nasional, maibe antes halo kongresu Nasional PD sei halo Konferensia Postu Administrativu neebe sei hahu iha loron 14 fulan Dezembru too iha loron 23 Fevreru 2025.
Nia sublina, halo tiha konferensia Postu Administrativu, mak sei hakat ba konferensia Munisipal neebe sei hahu iha loron 18 fulan Janeiru too iha loron 15 Marsu tinan 2025.
Iha mos desizaun hodi halo kongresu ba Organizasaun massa PD nian, hanesan organizasaun Juventude Demokratiku, organizasaun Mulher Demokratika, organizasaun Profissional Demokratiku, no organizasaun hirak nee mos sei halo nia kongresu iha loron 22 fulan Marsu to iha loron 30 fulan Marsu.
CPN fo fiar tomak no kompetensia tomak ba Konselu Ezekutivu Nasional hodi implementa rezolusaun Konselhu Politiku Nasional PD nian, iha territoriu laran.
(ter)
