DILI, STLTIMORLESTE.com – Bankada Partidu Demokratiku (PD) iha Parlamentu Nasional (PN) husu Sekretariu Estadu Asuntu Toponimia no Organizasaun Urbana (SEATOU) atu tau atensaun ba populasaun sira neebe okupa uma portuges besik Jardin 05 Maiu.
Lia hirak nee Deputadu Bankada Partidu Demokrátiku (PD), Deputadu Antonio da Conceição levanta liu husi plenaria PN, Segunda (13/01/2025).
“Fatin sira neebe klasifika nuudar espasu publiku hodi bolu governu nia atensaun atu ordena kapital Dili, primeiru iha zona Farol, besik igreja Motael, konkretamente iha Jardín 05 Maiu nia sorin, tanba iha populasaun lubuk ida neebe okupa hela uma portuges nian,” rekomenda Deputadu Antonio da Conceição.
Nia hatutan, populasaun neebe okupa uma portuges iha Jardin 05 Maiu nee estraga imajen kapital Dili, tanba sira balu ba haris, fase hena no habai hena iha estrada ninin.
“Okupante balu ba haris iha estrada ninin no jardin laran hodi estraga panorama jardin nian nomos perturba lao ain no pasajeiru sira neebe liu husi fatin nee, no fatin nee mos besik los turista sira wainhira tun husi roo,” dehan Deputadu Antonio.
(alb)