DILI, STLTIMORLESTE.com — Provedor Direitus Umanus no Justisa (PDHJ) husu Polísia Nasionál Timor-Leste (PNTL) no Ministériu Interior (MI) atu estabelese komisaun independente ida ba prosesu rekrutamentu foun PNTL.
Provedor Virgilio da Silva Guterres dehan, pedidu ne’e importante atu garante prosesu rekrutamentu lao ho rigor, transparénsia no independénsia, liuliu tanba iha irregularidade iha prosesu rekrutamentu anterior.
“Desizaun Tribunal Rekursu deside a favor ba ami katak halo diskriminasaun, hanesan bazeia ba estatutu sosial, viola lei no viola Konstituisaun. Iha rekrutamentu foun ne’e, ami husu ba Polísia no Ministru Interior atu estabelese komisaun ida ne’ebé independente,” dehan Provedor ba Jornalista sira iha Parlamentu Nasional Tersa, 15/09/2026.
Tuir PDHJ, ema ne’ebé partisipa ona iha prosesu rekrutamentu anterior ne’ebé sai problema labele envolve tan iha prosesu foun. Komisaun tenke kompostu husi ema foun, inklui ofisiál Polísia sira ne’ebé la iha konflitu interese no la envolve ona iha prosesu anterior.
PDHJ hatutan katak, prosesu foun tenke haree ho rigor no independénsia, atu evita irregularidade no diskriminasaun.
Provedor mos husu Komando PNTL no Ministériu Interior atu konsidera rekomendasaun husi Komisaun Revizaun, inklui labele iha diskriminasaun bazeia ba seksu, rasa, estatutu sosial ka persentajen kona-ba oan Polísia.
Tuir PDHJ, prinsipiu sira ne’e la’ós de’it rekomendasaun, maibé relasiona mos ho desizaun Tribunal Rekursu kona-ba fiskalizasaun ne’ebé Provedor hatama.
PDHJ sei kontinua halo akompañamentu liuhusi Direksaun Fiskalizasaun no rekomendasaun, no sei kontinua komunikasaun ho Ministériu Interior no PNTL.
PDHJ mos hakarak hametin kooperasaun institusional ho PNTL, inklui iha área formasaun direitus umanus. Materia direitus umanus sei konsidera atu integra iha kuríkulu formasaun Polísia.
PDHJ esplika katak irregularidade iha prosesu rekrutamentu anterior sai preokupasaun públiku no lori ba intervensaun PDHJ. Ikusmai, Governu liuhusi Rezolusaun Konsellu Ministrus suspende prosesu rekrutamentu ne’e.
Komisaun ne’ebé halo avaliasaun ba prosesu anterior rekomenda atu hahú prosesu rekrutamentu foun. Agora, PDHJ hein Ministériu Interior no Komando PNTL atu inisia prosesu foun.
Iha fatin ketak, akademiku UNTL, Rafael de Jesus, dehan prosesu rekrutamentu tenke halao ho rigor atu ema ne’ebé kumpre kritériu mak bele liu.
“Teste sira hanesan ne’e tenke halo ho rigor, atu ema ne’ebé kumpre kritériu bele liu, atu labele hamosu dúvida iha sosiedade,” dehan nia.
Nia hein katak teste foun sei lao ho di’ak no tuir regra, atu evita preokupasaun iha sosiedade no garante ema ne’ebé kumpre kritériu mak hetan oportunidade atu tama iha karreira Polísia.
(ter)
