DILI, STLTIMORLESTE.com — Provedor Direitus Umanus no Justisa (PDHJ) konfirma simu ona pedidu husi Komisaun Anti-Korrupsaun (KAK) kona-ba fiskalizasaun abstrata ba Tribunal Rekursu (TR), relasiona ho atuasaun Ministériu Públiku (MP) iha prosesu korrupsaun.
PDHJ dehan, pedidu husi KAK ne’e sei analiza uluk husi parte legal, atu haree se iha fundamentasaun no razaun legal suficiente ka lae atu halo fiskalizasaun.
“Ami simu ona pedidu husi KAK. Ami enkontru mos ho Komisáriu no ko’alia kona-ba ida ne’e. Dokumentus agora iha parte legal sira-nia meza,” dehan Provedor Virgilio Da Silva Guterres ba jornalista sira iha Parlamentu Nasional Tersa nee.
Nia hatutan katak, pedidu ne’e haruka ona ba parte legal atu halo análize no haree fundamentasaun legal husi pedidu ne’e.
PDHJ mos sei haree kompeténsia KAK no kompeténsia Ministériu Públiku, atu garante katak la iha konflitu ka violasaun ba kompeténsia institusionál.
“Dala ruma Ministériu Públiku halo avokasaun mos uza nia kompeténsia. Agora atu haree kompeténsia ne’e prejudika ka lae, viola ka lae kompeténsia KAK nian, ida ne’e mak ita atu haree,” nia esplika.
PDHJ informa katak, to’o agora, seidauk hatama pedidu fiskalizasaun ba Tribunal Rekursu. KAK hato’o ona pedidu, no PDHJ haruka dokumentus ba parte legal atu identifika se iha posibilidade legal ka fundamentasaun atu hatama fiskalizasaun ka lae.
PDHJ hatutan katak, preokupasaun prinsipál mak, se depois husi avaliasaun, iha fundamentu atu lori matéria ne’e ba Tribunal Rekursu, maibe Juiz balu hetan hela suspensaun se maka hare konaba fiskalizasaun nee.
Iha sorin seluk, akademiku UNTL, Rafael de Jesus, dehan KAK no Prokuradór tenke iha koordenasaun di’ak atu halo investigasaun ba kazu sira ne’ebé iha natureza korrupsaun.
“Sei iha solusaun di’ak atu KAK hamutuk ho Prokuradór kontinua halao knar ho di’ak, koopera ba malu atu kombate krime korrupsaun,” dehan nia.
Nia hatutan katak, kazu sira ne’ebé iha natureza korrupsaun dala barak komplika, tanba ne’e presiza kooperasaun di’ak entre instituisaun sira atu bele deteta no investiga kazu sira ho efikásia.
(ter)
